"ირანი დონალდ ტრამპის ლიკვიდაციისთვის ემზადება" - WSJ

ისრაელის ხელისუფლებამ ამერიკის შეერთებულ შტატებს მიაწოდა სადაზვერვო ინფორმაცია, რომლის მიხედვითაც ირანმა აშშ-ის პრეზიდენტის, დონალდ ტრამპის წინააღმდეგ მკვლელობის ახალი გეგმა შეიმუშავა. საყურადღებოა, რომ ეს მონაცემები ოფიციალურმა პირებმა გამოცემა Wall Street Journal-ს უკვე დაუდასტურეს. მათი განმარტებით, ახლად გაჩენილი საფრთხე ვაშინგტონსა და თეირანს შორის არსებულ დაძაბულობას კიდევ უფრო გაამწვავებს. აღსანიშნავია, რომ ტრამპის შესაძლო ლიკვიდაციის საკითხზე ინფორმაცია ორი დამოუკიდებელი წყაროსაგან ტელეკომპანია CNN-მაც მიიღო. მათი მტკიცებით, შესაბამისი საფრთხის შესახებ ისრაელისგან ამერიკულ მხარეს მიმდინარე კვირაში ეცნობა.

მნიშვნელოვანია აღინიშნოს, რომ შესაძლო ლიკვიდაციაზე თავად დონალდ ტრამპმაც ილაპარაკა. მან ანკარაში გამართულ NATO-ს სამიტზე ჟურნალისტებთან საუბრისას აღნიშნა, რომ ის ირანის სამიზნეთა სიის სათავეშია და აღნიშნა, რომ ინფორმაცია მასაც სადაზვერვო მონაცემებიდან აქვს მიღებული. ტრამპის თქმით, აქამდე მას უმართლებდა, თუმცა ეს შეიძლება დიდხანს არ გაგრძელდეს.

აღსანიშნავია, რომ ირანში ტრამპის წინააღმდეგ შურისძიების შესახებ საჯარო მოწოდებები სადაზვერვო მონაცემების გავრცელებამდეც აქტიურად ისმოდა. ეს კი განსაკუთრებით მას შემდეგ გახშირდა, რაც ქვეყანაში დაღუპულ უმაღლეს სულიერ ლიდერთან, აიათოლა ალი ხამენეისთან გამოსამშვიდობებელი რამდენიმედღიანი პროცესია დაიწყო. სხვადასხვა ქალაქის ქუჩებში ტრამპის მკვლელობის მუქარის შემცველი ბანერებიცაა გამოკრული.