ირანის მთავრობა ფინანსურ სერვისებს სტეიბლკოინებით იღებს – სენატის ანგარიში

აშშ-ის სენატის დემოკრატიული პარტიის წარმომადგენლებმა გამოაქვეყნეს ანგარიში, რომლის მიხედვითაც სტეიბლკოინმა USDT-მ ირანისა და მასთან დაკავშირებული ტერორისტული ორგანიზაციების დაფინანსებას შეუწყო ხელი.

სენატორ რიჩარდ ბლუმენტალის ხელმძღვანელობით მომზადებულმა დოკუმენტმა შეისწავლა ის 846 კრიპტოსაფულე, რომლებსაც თეირანთან კავშირის გამო ამერიკულმა და ისრაელურმა მხარეებმა სანქციები დაუწესეს.

როგორც ჩანს, სანქცირებული კრიპტოსაფულეების 84% ტრანზაქციებს მხოლოდ USDT-ის გამოყენებით ახორციელებდა. კერძოდ, ირანის მთავრობა და ცენტრალური ბანკი ამერიკული სანქციების ფონზე საერთაშორისო გადარიცხვებსა და ეროვნული ვალუტის მხარდაჭერას სწორედ დასახელებული აქტივით ახერხებდნენ.

როგორც სენატორმა განმარტა, ბოლო პერიოდში კრიტპოკომპანია Tether-ი ირანის ჩრდილოვანი საბანკო სისტემის მთავარ ინსტრუმენტად იქცა. შექმნილი ვითარების გამო, სენატორმა აშშ-ის იუსტიციისა და ფინანსთა სამინისტროებს კომპანიის წინააღმდეგ გამოძიების დაწყებისკენ მოუწოდა.

რაც შეეხება კომპანიის პოზიციას, Tether-ის აღმასრულებელმა დირექტორმა პაოლო არდოინომ ამერიკულ მთავრობასთან თანამშრომლობის მზაობა გამოთქვა. არდოინოს მტკიცებით, მისი კომპანია სანქცირებული პირებისა და კრიმინალური ქსელებისთვის უსაფრთხო გარემოს არ ქმნის. ამასთან, უნდა ითქვას ისიც, რომ Tether-მა 2026 წლის განმავლობაში ირანთან დაკავშირებული $550 მილიონის ღირებულების USDT გაყინა.