ირანის ომი აშშ-ს ამ დრომდე $37.5 მილიარდი დაუჯდა - პენტაგონი დამატებით $67 მილიარდს ითხოვს

ირანში მიმდინარე ომის ხარჯებმა ამ დროისთვის 37.5 მილიარდ დოლარს მიაღწია, - ამის შესახებ აშშ-ის თავდაცვის მდივანმა, პიტ ჰეგსეტმა განაცხადა. მან სკეპტიკურად განწყობილ კანონმდებლებს პირველად მიმართა მას შემდეგ, რაც ინტენსიური დაბომბვები განახლდა, რათა კონფლიქტისთვის გადაუდებელი დაფინანსება მოეთხოვა.

ვაშინგტონში გამართულ მოსმენაზე ჰეგსეტმა კანონმდებლებს განუცხადა, რომ 37.5 მილიარდი დოლარი მოიცავს ომის გარკვეულ ასპექტებს, ისევე როგორც 30 სექტემბრამდე პროგნოზირებულ ხარჯებს.

ჰეგსეტმა სენატის ასიგნებების კომიტეტს ასევე განუცხადა, რომ აუცილებელია პენტაგონისთვის დამატებითი 87 მილიარდი დოლარის დამტკიცება, საიდანაც 67 მილიარდი დოლარი ახლო აღმოსავლეთში მიმდინარე ოპერაციებს მოხმარდება.

გაურკვეველია, თუ როგორ მივიდა პენტაგონი ამ ციფრამდე. მარტში სააგენტო Reuters-ის წყარომ განუცხადა, რომ ტრამპის ადმინისტრაციის შეფასებით, ომის პირველი ექვსი დღე სულ მცირე 11.3 მილიარდი დოლარი დაჯდა.

გასულ თვეში ტრამპმა კონგრესს თითქმის 90 მილიარდი დოლარის დამატებითი დაფინანსება სთხოვა, რომლის უდიდესი ნაწილი ირანის კონფლიქტს უკავშირდება. ამან საფუძველი კანონმდებლებთან მორიგ დაპირისპირებას ჩაუყარა, რომლებიც უკმაყოფილონი არიან ომით და ნოემბრის შუალედური არჩევნების მოლოდინში იმყოფებიან.

ჰეგსეტმა კანონმდებლებს ასევე განუცხადა, რომ გადაუდებელი დაფინანსების გარეშე სამხედრო წვრთნების შემცირება გახდება საჭირო.

ომმა სერიოზული დატვირთვის ქვეშ დააყენა პენტაგონის თითქმის 1-ტრილიონიანი ბიუჯეტი და საფრთხის წინაშე დააყენა სამხედრო პერსონალთან დაკავშირებული საკითხების დაფინანსება. შტაბების გაერთიანებული კომიტეტის თავმჯდომარემ, გენერალმა დენ ქეინმა მოსმენაზე აღიარა ეს რისკები და აღნიშნა, რომ მიუხედავად იმისა, რომ სამხედრო მოსამსახურეების ხელფასების გადახდის გზებს გამონახავენ, პენტაგონს შესაძლოა გაუჭირდეს ტექნიკური მომსახურების ხარჯების დაფარვა და მომავალ თავდაცვით შესაძლებლობებში ინვესტირება.

ჰეგსეტმა კანონმდებლებს მოუწოდა, მხარი დაუჭირონ არა მხოლოდ დამატებით მოთხოვნას, არამედ 2027 წლისთვის წარდგენილ 1.5-ტრილიონიან საბიუჯეტო განაცხადსაც.

"მიმაჩნია, რომ ამ უწყების 1.5 ტრილიონი დოლარით არდაფინანსება ყველაზე დიდი საფრთხეა, რომლის წინაშეც ჩვენი ქვეყანა დგას", - აღნიშნა ჰეგსეტმა.

აშშ-სა და ირანს შორის არსებული ზავის რეჟიმი მიმდინარე თვის დასაწყისში დაირღვა და მას შემდეგ მხარეები ერთმანეთზე ყოველდღიურ დარტყმებს ახორციელებენ.