ირანთან ომმა ამერიკელ მომხმარებლებს ენერგოხარჯები $100 მილიარდით გაუზარდა

ირანში მიმდინარე ომის გამო, ამერიკელი მომხმარებლების ენერგოხარჯები თითქმის $100 მილიარდით გაიზარდა. ბრაუნის უნივერსიტეტის კვლევითი ჯგუფის მონაცემებით, ირანში საომარი მოქმედებების დაწყების შემდეგ, საწვავის გაძვირების გამო, აშშ-ში თითოეულ ოჯახზე დამატებითმა ფინანსურმა ტვირთმა საშუალოდ $760-ს გადააჭარბა.

დანახარჯების უდიდესი ნაწილი ბენზინის ფასის ზრდას უკავშირდება, თუმცა ბოლო პერიოდში განსაკუთრებით სწრაფი ტემპით დიზელის ღირებულება იზრდება. შტატებს შორის ყველაზე დიდი ფინანსური წნეხი ტეხასის მოსახლეობამ განიცადა, სადაც მომხმარებლებმა საწვავში დამატებით $11 მილიარდი გადაიხადეს. დანახარჯების მოცულობით მეორე და მესამე ადგილებს კალიფორნია და ფლორიდა იკავებენ, სადაც მაჩვენებელმა შესაბამისად $8 მილიარდი და $5 მილიარდი შეადგინა.

სოციოლოგიური გამოკითხვების თანახმად, მოახლოებული შუალედური არჩევნების ფონზე, ამომრჩევლები მთავარ გამოწვევად სწორედ ინფლაციას ასახელებენ და ამ მიმართულებით პრეზიდენტის პოლიტიკას ნეგატიურად აფასებენ.

ცნობისთვის, ირანთან ომის დაწყების შემდეგ, ბირჟაზე ნავთობის ფასი საშუალოდ 60%-ით გაიზარდა და დღეს აშშ-ის ეკონომიკის წინაშე არსებული მთავარი გამოწვევა სწორედ ინფლაციური ზეწოლაა.