ირანული მედია აშშ-სთან გაფორმებული, სავარაუდო, 14-პუნქტიანი მემორანდუმის დეტალებს აქვეყნებს

ირანული სახელმწიფო მედია ავრცელებს ინფორმაციას იმ დოკუმენტის პროექტის შესახებ, რომელიც, მათივე მტკიცებით, აშშ-სა და ირანს შორის გაფორმებული 14-პუნქტიანი ურთიერთგაგების მემორანდუმია.

აღსანიშნავია, რომ დოკუმენტში მოყვანილი პუნქტები ოფიციალურად ჯერჯერობით არცერთ მხარეს არც ვაშინგტონს და არც თეირანს არ დაუდასტურებია.

ირანული საინფორმაციო სააგენტო Mehr-ის ცნობით, მემორანდუმის სამუშაო ვერსია, სხვა საკითხებთან ერთად, შემდეგ პუნქტებს მოიცავს:

• მუდმივი ცეცხლის შეწყვეტა ყველა ფრონტზე, მათ შორის ლიბანში; • აშშ-ის ვალდებულება, არ ჩაერიოს ირანის შიდა საქმეებში; • აშშ-ის საზღვაო ბლოკადის გაუქმება 30 დღის ვადაში; • აშშ-ის ძალების გაყვანა ირანიდან; • ჰორმუზის სრუტის გახსნა 30 დღის ვადაში „ირანული რეგულაციებისა და შეთანხმებების შესაბამისად“; • აშშ-ისა და მისი მოკავშირეების მიერ ირანისთვის მინიმუმ 300 მილიარდი დოლარის ღირებულების აღდგენითი გეგმების მიწოდება; • სანქციების გაუქმება ირანულ ნავთობსა და ენერგოპროდუქტებზე; • ირანის მზაობის დადასტურება, რომ არ აწარმოებს ბირთვულ იარაღს; • აშშ-ის პირობა, რომ არ გაზრდის საკუთარ სამხედრო კონტინგენტს რეგიონში და არ დააწესებს ახალ სანქციებს.

სააგენტო Mehr-ის წყაროს ცნობით, „საბოლოო მოლაპარაკებები მანამ არ დაიწყება, სანამ ირანის გაყინული ფონდების ნახევარი არ გათავისუფლდება, ნავთობზე დაწესებული სანქციები არ შეჩერდება და საზღვაო ბლოკადა არ მოიხსნება“.

ირანული მედიის ინფორმაციით, საბოლოო შეთანხმება ძალაში გაეროს უშიშროების საბჭოს რეზოლუციის საფუძველზე უნდა შევიდეს.