"ივნისი 83%-იანი დატვირთვით დავასრულეთ" - როგორია მოთხოვნა თელავში სასტუმრო "ესკიზზე"?
კახეთში მდებარე სასტუმრო „ესკიზმა“ ივნისი 83%-იანი დატვირთვით დაასრულა, - ამის შესახებ სასტუმროს მარკეტინგის ხელმძღვანელმა ნია პატარაშვილმა BMGTV-ის გადაცემაში „ქალების ნარატივი“ განაცხადა.
მისი თქმით, კახეთში ტურისტული სეზონი აქტიურდება და მიუხედავად იმისა, რომ არასტაბილური ამინდების გამო სეზონის პიკმა მცირედით გადაიწია, სასტუმრომ მაღალი დატვირთვის შენარჩუნება შეძლო.
„მაისიდან უკვე ძალიან ბევრი სტუმარი გვყავს. ძირითადად ადგილობრივი დამსვენებელი, ქართველი აუდიტორია გვყავს და შაბათ-კვირა სრულად დატვირთულია. ამინდებმა ცოტა გაგვაწვალა და სეზონიც გარკვეულწილად გადაიწია, თუმცა ვცდილობთ, პოზიტიური დინამიკა შევინარჩუნოთ“, – განაცხადა ნია პატარაშვილმა.
მისი განმარტებით, ივნისში სასტუმროს დატვირთვამ 83% შეადგინა, თუმცა სამუშაო დღეებში მოთხოვნის გასაზრდელად სპეციალური შეთავაზებებისა და სხვადასხვა აქტივობების ამოქმედება გახდა საჭირო.
"როდესაც სამუშაო დღეებში დატვირთვა შედარებით ნაკლები იყო, გავაკეთეთ სხვადასხვა შეთავაზება და აქციები ჩვენი მომხმარებლებისთვის. დღეს დასვენების დაგეგმვისას ბიუჯეტი ერთ-ერთი მნიშვნელოვანი ფაქტორია და მცირე შეღავათიც ხშირად გადაწყვეტილებაზე მოქმედებს“, - აღნიშნა მან.
როგორც სასტუმროს მარკეტინგის ხელმძღვანელი ამბობს, სტუმრების ინტერესის შესანარჩუნებლად „ესკიზი“ ყოველ შაბათ-კვირას მუსიკალურ საღამოებსა და სხვადასხვა გასართობ აქტივობას სთავაზობს დამსვენებლებს.
„გვინდა, რომ სტუმრობა მხოლოდ განთავსებით არ შემოიფარგლოს. ამიტომ ყოველ ვიქენდზე ვაკეთებთ სხვადასხვა აქტივობას, მუსიკალურ საღამოებს, რათა სტუმრებისთვის ეს დრო უფრო დასამახსოვრებელი იყოს. შესაბამისად, აგვისტოს ვიქენდები სრულად დატვირთულია, შემოდგომისთვისაც უკვე გვაქვს გარკვეული ჯავშნები. დაახლოებით 70%-იან დატვირთვაზე ვართ ყოველ შაბათ-კვირას“, – აღნიშნა მან.
მისივე თქმით, სასტუმროს სტუმრების დაახლოებით 80% ქართველია, თუმცა უცხოელი ვიზიტორების რაოდენობაც იზრდება. განსაკუთრებით გააქტიურდა გერმანიის ბაზარი, ასევე მოთხოვნა ფიქსირდება იტალიიდან, პოლონეთიდან და ჩინეთიდან.