ხორვატიაში ევროპის პირველი კომერციული რობოტაქსის სერვისი ამოქმედდა

Uber-ის მხარდაჭერითა და ჩინური თვითმართვადი კომპანია Pony.ai-ის ტექნოლოგიით აღჭურვილმა ხორვატიულმა კომპანია Verne-მა, ზაგრებში შერჩეული კლიენტებისთვის 10 ავტომატიზებული ავტომობილი აამოქმედა.

მიუხედავად იმისა, რომ მსგავსი სერვისები ჩინეთსა და შეერთებულ შტატებში წლებია ხელმისაწვდომია, ევროპულ გზებზე ავტონომიური (უპილოტო) ტაქსების სერვისის დასანერგად რამდენიმე კომპანია კვლავ კონკურენციაშია ჩართული.

Verne-ის სერვისი სრულად ავტონომიურ მუშაობაზეა გათვლილი, თუმცა მიმდინარე ეტაპობრივი დანერგვის პროცესში საჭესთან დროებით იმყოფება "ოპერატორი" იმ შემთხვევისთვის, თუ ადამიანის ჩარევა გახდება საჭირო.

მიუხედავად ხორვატიული საცობების, ხშირი ქაოსისა და რთული გზაჯვარედინებისა, Verne-ის ქვეყნის ოპერაციების ხელმძღვანელმა, ფილიპ ცინდრიჩმა აღნიშნა, რომ მგზავრობის უმეტესობა "ყოველგვარი ჩარევის გარეშე" სრულდება.

ცინდრიჩის თქმით, მგზავრთა 90%-მა სერვისს ოთხი ან ხუთი ვარსკვლავი მიანიჭა და ათიათასობით გავლილი კილომეტრის განმავლობაში არცერთი შეჯახება არ დაფიქსირებულა.მიუხედავად იმისა, რომ სერვისი პირველად აპრილის დასაწყისში დაანონსდა, ზაგრების ქუჩებში ეს ავტომობილები ჯერ კიდევ იშვიათად ჩანს.

როგორც Verne-ის აღმასრულებელმა დირექტორმა, მარკო პეიკოვიჩმა AFP-ს განუცხადა, ამჟამად ავტომობილები მოძრაობენ ქალაქის ცენტრში, სამხრეთ ნაწილებსა და აეროპორტის მიმდებარე ტერიტორიებზე.

"გაფართოება ეტაპობრივია. თითოეული ახალი ზონა ემატება მხოლოდ დეტალური შემოწმების შემდეგ და მას მერე, რაც სისტემა რეალურ პირობებში საიმედობას დაამტკიცებს", - აღნიშნა პეიკოვიჩმა განცხადებაში.

კომპანიის ინფორმაციით, ავტომატიზებული სერვისის მიმართ, რომლის ღირებულებაც ერთ მგზავრობაზე 1.99 ევროა, ინტერესი დიდია და ამჟამად მოლოდინის სიაში დაახლოებით 4 000 ადამიანია.

პეიკოვიჩის თქმით, დაბალი ფასი მომხმარებლების მიზიდვასა და უკუკავშირის წახალისებას ემსახურება, თუმცა სერვისის გაფართოებასთან ერთად ფასების ზრდაა მოსალოდნელი.ავტომატიზებული მანქანები, რომელთა გამოძახებაც ნებისმიერი სხვა ტაქსის აპლიკაციის მსგავსად Verne-ის აპლიკაციით ხდება, აღჭურვილია მრავალი კამერით, ლაზერებით და რადარებით, რომლებიც მათ ქუჩებში ორიენტაციაში ეხმარება.

2019 წელს დაარსებული Verne-ის განცხადებით, მოლაპარაკებები მიმდინარეობს ევროკავშირის, გაერთიანებული სამეფოსა და ახლო აღმოსავლეთის 11 ქალაქში.

ზაგრებში კომპანია წლის ბოლომდე სრულად უპილოტო ოპერირებაზე გადასვლას გეგმავს, რაც მარეგულირებლების თანხმობაზეა დამოკიდებული.