მადლობა ეროვნულ ბანკს და მთავრობის ეკონომიკურ გუნდს ეფექტიანი მუშაობისთვის | ირაკლი კობახიძე რეზერვების ზრდაზე

საქართველოს პრემიერ-მინისტრის განცხადებით, საერთაშორისო რეზერვების ზრდა სწორი ფისკალური და ეკონომიკური პოლიტიკის შედეგია. ბათუმში, ჟურნალისტებთან საერთაშორისო რეზერვების რეკოდრული მაჩვენებლების შეფასებისას, ირაკლი კობახიძემ განაცხადა, რომ ხელისუფლება ფისკალური კონსოლიდაციის ძალიან მაღალი ხარისხით გამოირჩევა. "ყველა პარამეტრი არის დაცული და ეკონომიკური ზრდის ტემპი არის მაღალი", - განაცხადა მან.

პრემიერის თქმით, მხოლოდ გასული თვის განმავლობაში სავალუტო რეზერვები ეროვნულმა ბანკმა 600 მილიონ დოლარზე მეტით გაზარდა და ისტორიულ მაქსიმუმზეა. მთავრობის მეთაურის განცხადებით, 8 მილიარდ დოლარს გადააჭარბა საერთო სავალუტო რეზერვებმა.

„საერთაშორისო რეზერვები ზრდა არის სწორი ფისკალური და ეკონომიკური პოლიტიკის შედეგი. ჩვენ გამოვირჩევით ფისკალური კონსოლიდაციის ძალიან მაღალი ხარისხით, ყველა პარამეტრი არის დაცული და ეკონომიკური ზრდის ტემპი არის მაღალი. წლევანდელი შვიდი თვის მაჩვენებელი არის 7.9%, რაც არის ყველაზე მაღალი მაჩვენებელი არა მარტო ფართო რეგიონში, არამედ ევროპის მასშტაბით. ეს ყველაფერი, იძლევა იმის საშუალებას, რომ გავზარდოთ სავალუტო რეზერვები და აქ ხაზი უნდა გაესვას ასევე საქართველოს ეროვნული ბანკის ძალიან ეფექტიან მუშაობას - 600 მილიონ დოლარზე მეტით გაზარდა მხოლოდ გასული თვის განმავლობაში სავალუტო რეზერვები ეროვნულმა ბანკმა და ისტორიულ მაქსიმუმზეა დღეს, 8 მილიარდ დოლარს გადააჭარბა ჩვენმა საერთო სავალუტო რეზერვებმა. მადლობას გადავუხდი ეროვნულ ბანკს და მთლიანად ჩვენი მთავრობის ეკონომიკურ გუნდს ეფექტიანი მუშაობისთვის, სწორედ ამის შედეგია რეკორდულ ნიშნულზე არსებული სავალუტო რეზერვები“, - განაცხადა პრემიერმა.