მადლობა პარლამენტს, რომ სებ-ს შესაბამისი რეგულაციების შექმნის შესაძლებლობა მისცა - ვაკო თურნავა ლარის სტებლკოინის გამოშვებაზე

„დღევანდელი დღე ძალიან მნიშვნელოვანია ჩვენი ქვეყნის ეკონომიკისთვის, განსაკუთრებით იმიტომ, რომ კომპანია Tether ერთ-ერთი უდიდესი კომპანიაა“, - ამის შესახებ დეპუტატმა ვაკო თურნავამ პრეზენტაციის დასრულების შემდეგ მედიასთან განაცხადა.

თურნავას თქმით, Tether-ის დამფუძნებლების ჩამოსვლა და მათი მხრიდან ინტერესის გამოხატვა საქართველოსთვის დიდი ნაბიჯია, რადგან კომპანიას ქვეყანაში მასშტაბური ინვესტიციების განხორციელების პოტენციალი აქვს.

"დღევანდელი დღე ძალიან მნიშვნელოვანია ჩვენი ქვეყნის ეკონომიკისთვის, განსაკუთრებით იმიტომ, რომ კომპანია Tether ერთ-ერთი უდიდესი კომპანიაა. ალბათ მსოფლიო მასშტაბით ათეულში, ან ოცეულში მაინც. ზუსტად დღეს მათი აქ ყოფნა, დამფუძნებლების ჩამოსვლა და ინტერესის გამოთქმა ჩვენი ქვეყნისთვის ძალიან დიდი ნაბიჯია. იმიტომ, რომ ამ კომპანიას შეუძლია ჩვენს ქვეყანაში ასეულობით მილიონი და მილიარდობით ინვესტიცია განახორციელოს.

სხვათა შორის, ეს მათი პირველი ჩამოსვლა არ ყოფილა [საქართველოში], უკვე მესამე ვიზიტი იყო. მათ საქართველოში სხვადასხვა სტარტაპში რამდენიმე ასეული მილიონი უკვე აქვთ ჩადებული. ზუსტად ეს არის ის, რასაც ამდენი ხნის განმავლობაში ვამბობდი, მნიშვნელოვანია, რომ საქართველო ციფრული ტრანსფორმაციის გზაზე იყოს, და სწორედ ასე ხდება.

მადლობა პარლამენტს, რადგან მათ ეროვნულ ბანკს მისცეს შესაძლებლობა, შესაბამისი რეგულაციები შეემუშავებინა, რათა ასეთი კომპანიებისთვის ჩვენს ქვეყანაში შემოსვლა უფრო მარტივი ყოფილიყო. ამიტომ, კიდევ ერთხელ მინდა მადლობა გადავუხადო მათ.

დარწმუნებული ვარ, უახლოეს მომავალში ბევრ საინტერესო ინვესტიციას დააანონსებენ. ამას, რა თქმა უნდა, დამატებითი სტიმულიც ექნება, რადგან როდესაც ასეთი დიდი კომპანიები შემოდიან, მათთან ერთად ბევრი სხვა კომპანიაც შემოდის, რაც კიდევ უფრო დიდ განვითარებას გამოიწვევს", - განაცხადა ვაკო თურნავამ პრეზენტაციის დასრულების შემდეგ მედიასთან.

Tether საქართველოს მთავრობასთან თანამშრომლობით ქართული ლარის სტეიბლკოინის GEL₮-ის გამოშვებას გეგმავს. კომპანიის განცხადებით, პროექტი ერთ-ერთი პირველი მცდელობაა, რომლის ფარგლებშიც ეროვნული ვალუტა სპეციალურად შექმნილი რეგულაციური ჩარჩოს პირობებში ციფრულ ფინანსურ ინფრასტრუქტურაში ინტეგრირდება.

როგორც განცხადებაშია აღნიშნული, GEL₮ ქართული ლარის ციფრული ვერსია იქნება და მიზნად ისახავს ტრანზაქციების გაიაფებას, თითქმის მყისიერ ანგარიშსწორებასა და ციფრულ ფინანსურ სისტემებში გადარიცხვების გამარტივებას. პროექტი ხელს შეუწყობს როგორც ფინტექის განვითარებას, ისე საერთაშორისო გადახდებსა და რეგიონში ციფრული ფინანსური ინფრასტრუქტურის გაფართოებას.