მაღალმთიანი დასახლებების განვითარების ფონდიდან ორ მუნიციპალიტეტს ₾14.2 მლნ გამოეყოფათ

მთავრობის განკარგულებით, მაღალმთიანი დასახლებების განვითარების ფონდიდან მუნიციპალიტეტებს ჯამში 14 200 113 ლარი გამოეყოფათ.

თანხები მუნიციპალიტეტებს კონკრეტული ინფრასტრუქტურული პროექტების განსახორციელებლად გადაეცემათ. დოკუმენტში დეტალურად არის გაწერილი ჩოხატაურისა და ლენტეხის მუნიციპალიტეტებში პროექტებისთვის გამოყოფილი თანხები. ჩოხატაურის მუნიციპალიტეტისთვის ჯამში 764 958 ლარია გამოყოფილი.

დოკუმენტის მიხედვით, მუნიციპალიტეტში დაფინანსდება სამი პროექტი:

გზის მოწყობა სოფელ ქვაბღაში: ცენტრალური გზიდან ქვაბღის ცენტრისკენ მიმავალი ბეტონისსაფარიანი საავტომობილო გზის მოწყობისთვის გამოიყო 302 857 ლარი.

გზის რეაბილიტაცია სოფელ ზოტში: სკოლიდან სალოცავის მიმართულებით გზის სავალი ნაწილის რეაბილიტაციას მოხმარდება 90 569 ლარი.

სპორტული სტადიონი ბახმაროში: დაბა ბახმაროში, ყოფილი სანატორიუმის ეზოში, სპორტული სტადიონის მოწყობისთვის გამოყოფილია 371 532 ლარი.

ლენტეხის მუნიციპალიტეტისთვის ჯამში 291 095 ლარია გამოყოფილი.

დანართის მიხედვით, გამოყოფილი ბიუჯეტი მოხმარდება ორ პროექტს:

მჟავე წყლის კეთილმოწყობა სოფელ ლასკადურაში: პროექტის განხორციელებისთვის გამოიყო 81 754 ლარი.

მჟავე წყლის კეთილმოწყობა სოფელ ხოფურში: აღნიშნული სამუშაოების დასაფინანსებლად გამოიყო 209 341 ლარი.

მთავრობის განკარგულებაში აღნიშნულია, რომ გადაწყვეტილება მიღებულია რეგიონული განვითარების სამთავრობო კომისიის მიერ 2026 წლის 3 ივნისს მიღებული გადაწყვეტილების შესაბამისად და ეფუძნება საბიუჯეტო კანონმდებლობას.