Mastercard-მა ფინანსურ დირექტორად ლინგ ჰაი დანიშნა

Mastercard-მა მენეჯმენტის რესტრუქტურიზაციის ფარგლებში ფინანსურ დირექტორად ლინგ ჰაი დანიშნა. არსებული ინფორმაციით, საკადრო ცვლილებები ძალაში მიმდინარე წლის 3 აგვისტოდან შევა.

რაც შეეხება ყოფილ ფინანსურ დირექტორს, საჩინ მეჰრა ბიზნესის მთავარი დირექტორის ახლად შექმნილ პოზიციას დაიკავებს. პარალელურად, ამერიკის მიმართულების პრეზიდენტი ლინდა კირკპატრიკი სერვისების მთავარი დირექტორის პოზიციაზე კრეიგ ვოსბურგს შეცვლის.

როგორც ირკვევა, ახალი საკადრო რეორგანიზაცია მიზნად მომხმარებლებზე ფოკუსირებული ოპერაციების გაძლიერებასა და ბაზრებს შორის კოორდინაციის გაუმჯობესებას ისახავს.

ახალი საკადრო გადაწყვეტილებები ციფრული გადახდების სფეროში Mastercard-ის განახლებულ სტრატეგიასთან არის დაკავშირებული. როგორც ცნობილია, კომპანია კომერციული გადახდების ბიზნესს აქტიურად აფართოებს და ტრადიციული ბარათების მიღმა ზრდის ახალ შესაძლებლობებს ეძებს. შესაბამისად, საჭიროებს ისეთ სპეციალისტებს, რომლებიც სწორედ ამ მიმართულებით ფლობენ ცოდნასა და გამოცდილებას.

ცვლილებას უკვე გამოეხმაურნენ საერთაშორისო ექსპერტები. RBC Capital Markets-ის ანალიტიკოსის, დანიელ პერლინის განცხადებით, მენეჯმენტის ცვლილებები ხელს მომხმარებელზე ფოკუსირებული მიდგომის გაერთიანებას შეუწყობს. მისი პროგნოზით, რეგიონული თავსებადობის გაუმჯობესება გლობალურ კლიენტებთან კორპორაციულ ურთიერთობებს მნიშვნელოვნად გააღრმავებს.