"მნიშვნელოვანი ელემენტია საფინანსო სექტორის სტაბილურობისათვის" - ირაკლი კოვზანაძე WB-სთან გაფორმებულ შეთანხმებაზე
"მნიშვნელოვანი ელემენტია საფინანსო სექტორის სტაბილურობისათვის", - ასე აფასებს ყოფილი პარლამენტარი, საფინანსო-საბიუჯეტო კომიტეტის ყოფილი თავმჯდომარე ირაკლი კოვზანაძე დღეს საქართველოს მთავრობასა და მსოფლიო ბანკს შორის ხელი მოეწერა შეთანხმებას, რომელიც ითვალისწინებს 35 მილიონი დოლარის გამოყოფას "საქართველოს საბანკო რეზოლუციის მზადყოფნის პროექტისათვის".
"აღსანიშნავია, რომ 2019 წელს პარლამენტში კოლეგებთან ერთად, მთავრობისა და ეროვნული ბანკის მხარდაჭერით მიღებული ეს კარგი ინიციატივა მნიშვნელოვანი ელემენტია საფინანსო სექტორის სტაბილურობისათვის და ბიზნეს გარემოს გაჯანსაღებისათვის", - აცხადებს ირაკლი კოვზანაძე.
საქმე ისაა, რომ პროექტის ფარგლებში საქართველოს სარეზოლუციო ფონდისთვის 35 მილიონი აშშ დოლარის მოცულობის პირობითი დაფინანსება - ე.წ. საკრედიტო ხაზი გახდება ხელმისაწვდომი. აღნიშნული რესურსი საჭიროების შემთხვევაში კომერციული ბანკის რეზოლუციის პროცესის დაფინანსებას მოხმარდება.
შესაბამის სასესხო შეთანხმებას დღეს მოაწერეს ხელი ფინანსთა მინისტრმა ლაშა ხუციშვილმა და სამხრეთ კავკასიაში მსოფლიო ბანკის რეგიონულმა დირექტორმა როლანდ პრაისმა.
ეროვნული ბანკის ინფორმაციით, მსოფლიო ბანკის მიერ დამტკიცებული პროექტი სარეზოლუციო ფონდისთვის ქმნის წინასწარ შეთანხმებულ საკრედიტო ხაზს, რომელიც ჩვეულებრივ პირობებში არ იქნება გამოყენებული. მისი ამოქმედება შესაძლებელი გახდება მხოლოდ კანონმდებლობით განსაზღვრულ შემთხვევაში - როდესაც ეროვნული ბანკი კომერციული ბანკის რეზოლუციის გადაწყვეტილებას მიიღებს და პროცესის დაფინანსების საჭიროება წარმოიქმნება.
BM.GE
წყარო: bm.ge