მოლდოვის პრემიერ-მინისტრი თანამდებობიდან გადადგა

მოლდოვის პრემიერ-მინისტრი ალექსანდრუ მუნტიანუ თანამდებობიდან გადადგა. არსებული ინფორმაციით, ეს ნაბიჯი მასსა და ქვეყნის პრეზიდენტ მაია სანდუს შორის არსებულ უთანხმოებას უკავშირდება. აღსანიშნავია, რომ მთავრობის მეთაურმა პოსტი თანამდებობაზე დანიშვნიდან ერთ წელზე ნაკლებ პერიოდში დატოვა. ყოფილმა ლიდერმა განაცხადა, რომ მან საკუთარი პრინციპების საწინააღმდეგოდ საქმიანობის გაგრძელებაზე უარი თქვა, თუმცა არ დააკონკრეტა, რა გახდა კონფლიქტის წინაპირობა.

მოლდოვას პრეზიდენტმა ყოფილ პრემიერ-მინისტრს გაწეული სამსახურისთვის მადლობა გადაუხადა. პრეზიდენტმა აღნიშნა, რომ ალექსანდრუ მუნტიანუმ ქვეყნის მართვის პასუხისმგებლობა ეკონომიკური რეფორმების განხორციელების რთულ პერიოდში აიღო.

მოლდოვას ლიდერი გამოეხმაურა გავრცელებულ ცნობებს იმის შესახებაც, რომ პრემიერ-მინისტრის საქმიანობას ხელი ხელოვნურად ეშლებოდა და მსგავს ინფორმაციას სიცრუე უწოდა.

რაც შეეხება მოვლენათა სამომავლო განვითარებას, მაია სანდუ ახალი პრემიერ-მინისტრის შერჩევის პროცესს დაუყოვნებლივ დაიწყებს. ქვეყნის ლიდერის შეფასებით, ევროკავშირში ინტეგრაციის გზაზე მოლდოვას შეფერხების უფლება არ აქვს. როგორც ის აღნიშნავს, ახალი მთავრობის უპირველესი დანიშნულება რეფორმების დღის წესრიგის სწრაფად შესრულება იქნება.