მთავრობამ "გვახა ჰესის" პროექტი მოიწონა|სად და ვინ აშენებს?

მთავრობამ "გვახა ჰესის" პროექტი მოიწონა. 7 მაისის განკარგულებით, ეკონომიკის სამინისტროს დაევალა ჰესი საჯარო და კერძო თანამშრომლობის პროექტად განიხილოს. სამინისტროს ასევე დაევალა ჰესის მშენებელ კომპანიასთან მთავრობასა და შპს აკავრეთას შორის ხელშეკრულების გაფორმების უზრუნველყოფა.

ამას გარდა, მშენებელმა კომპანიამ შპს აკავრეთამ ქედის მუნიციპალიტეტში „გვახა ჰესის ელექტროსადგურის“ პროექტის მოსამზადებელი სამუშაოების (კვლევების მომზადების) შესრულება უნდა უზრუნველყოს, საჯარო და კერძო თანამშრომლობის კანონმდებლობის შესაბამისად.

სამეწარმეო რეესტრის მიხედვით, კომპანიის მფლობელია "ჯორჯიან ჰაიდრო ფაუერი", რომელსაც შამილ ბირკაძე ფლობს.

საჯარო და კერძო თანამშრომლობის სააგენტოს მონაცემებით, პროექტის მიხედვით, ელექტროსადგურის დადგმული სიმძლავრეა 10 მგვტ, რაც გულისხმობს წელიწადში დაახლოებით 63.6 მლნ კვტ.სთ ელექტროენერგიის წარმოებას. მათივე მონაცემებით, ინვესტიციების მოცულობა $ 18,78 მლნ-ია. BMG-მ ეკონომიკის სამინისტროს ჰკითხა თუ შევიდა პროექტში ცვლილება, უწყებიდან პასუხის მიღების შემთხვევაში მასალა განახლდება.