მთავრობამ, წელს ანაკლიის პორტის პროექტისთვის ბიუჯეტიდან შესაძლოა დამატებითი თანხა გამოყოს

მთავრობამ შესაძლოა ანაკლიის პორტის პროექტისთვის, წლის ბოლოსთვის ბიუჯეტიდან დამატებითი თანხები გამოყოს. ამის შესახებ ფინანსთა მინისტრის პირველმა მოადგილემ რეგიონული პოლიტიკის კომიტეტის სხდომაზე ბიუჯეტის 6 თვის შესრულებისას წარდგენისას განაცხადა. გიორგი კაკაურიძეს არ დაუკონკრეტებია რა მოცულობის თანხა გამოიყოფა პროექტისთვის.

"წლის ბოლოს, ჩვენ, დიდი ალბათობით ანაკლიის პროექტზე თანხის დამატება მოგვიწევს. ეს პროექტი საკმაოდ კარგად მიმდინარეობს", - განაცხადა ფინანსთა მინისტრის პირველმა მოადგილემ.

2026 წლის ბიუჯეტით, უშუალოდ ანაკლიის ღრმაწყლოვანი პორტის ინფრასტრუქტურის მშენებლობისთვის გათვალისწინებულია 53 მილიონი ლარი, ხოლო წლის პირველ ნახევარში ამ თანხიდან მხოლოდ 1.6 მლნ ლარი უნდა ათვისებულიყო, ფაქტობრივმა ათვისებამ კი 0.3 მლნ ლარი შეადგინა. როგორც ფინანსთა მინისტრის მოადგილე, გიორგი კაკაურიძე განმარტავს ეს ძირითადად არის კონტრაქტორ კომპანიასთან - Jan De Nul-თან გაფორმებული შეთანხმების შესაბამისად, შესრულებული სამუშაოს ანაზღაურება წლის ბოლოს მოხდება, ხოლო ამჟამად უკვე ფაქტობრივად დაახლოებით $40 მილიონი დოლარის სამუშაოები არის შესრულებული.

Jan De Nul-ის ხომალდებმა ანაკლიის საზღვაო აკვატორიაში ფსკერის დაღრმავების სამუშაოები აქტიურად ზაფხულში დაიწყეს, რამდენიმე დღის წინ ტერიტორიაზე მეორე ხომალდიც შევიდა. კომპანიასთან 150 მილიონი დოლარის ღირებულების ხელშეკრულება არის გაფორმებული.

2026 წლის პირველ ივლისს ცნობილი გახდა, რომ საქართველოს მთავრობა ანაკლიის ღრმაწყლოვანი პორტის აშენებას შეცვლილი მოდელით გეგმავს - კერძო ინვესტორის ნაცვლად, პორტს სახელმწიფო ააშენებს, რისთვისაც დამატებით, დაახლოებით, 200 მილიონი დოლარის მობილიზება გახდება საერთაშორისო დონორებისგან საჭირო. პორტის ნავმისადგომების აშენების შემდეგ კი, სახელმწიფო გეგმავს გრძელვადიანი იჯარით გააქირავოს საპორტო ინფრასტრუქტურა სხვადასხვა ქვეყნის კერძო ლოგისტიკურ ჯგუფზე.

ეკონომიკის სამინისტრო ელის, რომ კერძო ოპერატორები, დაახლოებით, 350-400 მილიონი დოლარის ინვესტიციებს ჩადებენ სატერმინალო ინფრასტრუქტურის მოწყობაში.