"მწვავე პრობლემად საჯარო მოხელეთა გათავისუფლების ფაქტები გამოიკვეთა" - ომბუდსმენის ანგარიში
დღეს, 23 ივნისს, პარლამენტის პლენარულ სხდომაზე საქართველოს სახალხო დამცველს, ლევან იოსელიანს მოუსმინეს, რომელმაც დეპუტატებს ადამიანის უფლებათა დაცვის შესახებ 2025 წლის ანგარიში გააცნო.
სახალხო დამცველის განცხადებით, 2025 წელს საპროტესტო აქციებთან დაკავშირებული დაკავებებისა და სავარაუდო არასათანადო მოპყრობის ფაქტების რაოდენობა 2024 წელთან შედარებით შემცირდა, თუმცა პრობლემა კვლავ აქტუალურია. მისი თქმით, ანგარიშის მომზადების დროისთვის სახალხო დამცველის წარმომადგენლებმა აქციებზე დაკავებული 573 პირი მოინახულეს, რომელთაგან 302 სავარაუდო არასათანადო მოპყრობაზე მიუთითებდა, ხოლო 194-ს დაზიანებები აღენიშნებოდა. იოსელიანის შეფასებით, მნიშვნელოვანია, გაგრძელდეს სამართალდამცავთა მხრიდან შესაძლო ძალადობის ფაქტების ეფექტიანი გამოძიება და ყველა პასუხისმგებელი პირის გამოვლენა. მან ასევე აღნიშნა, რომ 2024 წლის საპროტესტო აქციების დროს გამოვლენილ ძალადობის საქმეებზე 2026 წლის მაისში უკვე წარედგინა ბრალდება 5 სამართალდამცავს, რაც მისი თქმით, პოზიტიური ნაბიჯია, თუმცა გამოძიების სრულყოფილად და დროულად დასრულება კვლავ გამოწვევად რჩება.
ომბუდსმენის გამოსვლიდან მთავარ საკითხებსა და აქცენტებს სახალხო დამცველის აპარატი ავრცელებს:
„სახალხო დამცველმა ლევან იოსელიანმა პლენარულ სხდომაზე სამოქალაქო და პოლიტიკური უფლებების მიმართულებით კანონმდებლობის გამკაცრებასა და ახალი, შემზღუდავი რეგულაციების სიმრავლესა და მათ შორის, შეკრების გამართვის ადგილთან და ფორმასთან დაკავშირებით დამატებითი შეზღუდვების დაწესებაზე ისაუბრა. აღნიშნა, რომ უფლების საკანონმდებლო დაცვის გარანტიების შესუსტებას თან სდევდა არაპროპორციული სახდელების დაწესება შეკრების თავისუფლებით სარგებლობასთან დაკავშირებული სამართალდარღვევებისთვის.
ამ თვალსაზრისით, განსაკუთრებით შემაშფოთებელია შეკრების მონაწილეთა ცალკეული მშვიდობიანი ქმედებების უალტერნატივოდ დაქვემდებარება ადმინისტრაციული პატიმრობისთვის, ისევე როგორც მათი განმეორებით ჩადენისთვის სისხლისსამართლებრივი პასუხისმგებლობის დაწესება.