"მთვარე ჩვენია" - დონალდ ტრამპი

დონალდ ტრამპმა სოციალურ ქსელში გაავრცელა პოსტი, რომლის მიხედვითაც ამერიკის შეერთებული შტატები მთვარეზე "პრეტენზიას" აცხადებს.

"მთვარე ჩვენია" - ასე აწერია პოსტს, რომელიც თეთრი სახლის ლიდერმა გამოაქვეყნა და, რომელშიც სხვა კონკრეტული არაფერია ნათქვამი.

ანალიტიკოსები მიიჩნევენ, რომ პრეზიდენტის ეს რიტორიკა მხოლოდ აშშ-ის გააქტიურებულ კოსმოსურ პროგრამებსა და გლობალურად გაზრდილ კონკურენციას უკავშირდება.

შეგახსენებთ, ბოლო რამდენიმე წელია შეერთებული შტატები NASA-ს მეშვეობით "არტემისის" პროგრამას აქტიურად ახორციელებს. ეს პროექტი მიზნად ასტრონავტების მთვარის ზედაპირზე დაბრუნებასა და იქ მუდმივი სამეცნიერო ბაზის შექმნას ისახავს.

ვაშინგტონმა სატესტო მისია Artemis 1 უკვე წარმატებით დაასრულა და ახლა ახალი ეკიპაჟის გაგზავნისთვის ემზადება.

აღსანიშნავია, რომ ვაშინგტონის ბოლოდროინდელი გაზრდილი ინტერესი პეკინთან მიმდინარე გეოპოლიტიკური დაპირისპირების ნაწილიცაა. ჩინეთი აქტიურად გეგმავს ექსპედიციებს მთვარის სამხრეთ პოლუსზე, სადაც წყლის ყინულის უხვი მარაგი ინახება. ანალიტიკოსების შეფასებით, ტრამპის მკვეთრი განცხადებები სწორედ რესურსებით მდიდარ სტრატეგიულ ზონებზე კონტროლის დამყარების სურვილს ასახავს.

ცნობისთვის, 1967 წელს გაეროს მიერ მიღებული "გარე სივრცის შეთანხმება" მთვარესა და სხვა ციურ სხეულებზე ეროვნული სუვერენიტეტის გამოცხადებას პირდაპირ კრძალავს. ამ საერთაშორისო დოკუმენტს ხელი ასზე მეტმა სახელმწიფომ, მათ შორის აშშ-მა მოაწერა.