ნავთობის ფასი 4%-ით დაეცა, რადგან ტრამპს ომის განახლება აღარ სურს

საერთაშორისო ენერგეტიკულ ბირჟაზე დაღმასვლის 4%-იანი ტენდენცია ფიქსირდება და ბარელი Brent-ის ფასი $94-ს შეადგენს, ხოლო WTI-ის ღირებულება $92-ის ფარგლებშია, რაც The Wall Street Journal-ის მიერ გავრცელებულ ინფორმაციას უკავშირდება, რომლის მიხედვით, აშშ-ის პრეზიდენტ დონალდ ტრამპს, ბოლო დროს მომხდარი სამხედრო შეტაკებების მიუხედავად, ირანთან სრულმასშტაბიანი ომის განახლება აღარ სურს.

WSJ-ის ინფორმაციით, რომელიც ანონიმურ ამერიკელ მაღალჩინოსნებს ეყრდნობა, დონალდ ტრამპმა თანაშემწეებს განუცხადა, რომ ირანთან ცეცხლის შეწყვეტის რეჟიმი გაგრძელდება. როგორც ირკვევა, თეთრი სახლის ლიდერმა აღნიშნა, რომ ზავის შეწყვეტის საკითხს მხოლოდ იმ შემთხვევაში განიხილავს, თუ ირანული მხარე ამერიკელ სამხედროებს მოკლავს.

ამ ინფორმაციის გავრცელება ბაზარზე აჩენს იმედს, რომ მხარეები კონფლიქტის მოლაპარაკებით დაასრულებენ და ჰორმუზის სრუტეში ნავთობის მიწოდება აღდგება.