ნიკოლ ფაშინიანი რუსეთის მიერ სომხური აგროპროდუქტის იმპორტის შეზღუდვას „მცდარ ნაბიჯებს“ უწოდებს

სომხურ აგროპროდუქტზე შეზღუდვების დაწესება შეცდომაა, რადგან ეს ადამიანებს ევრაზიული ეკონომიკური კავშირის წინააღმდეგ განაწყობს - სომხეთის პრემიერ-მინისტრის კომენტარს „არმენპრესის“ ავრცელებს. გამოცემა აღნიშნავს, რომ ნიკოლ ფაშინიანმა საკითხზე „იზვესტიას“ ჟურნალისტთან რუსეთის მიერ სომხური აგროპროდუქტის ექსპორტზე დაწესებული შეზღუდვების შეფასებისას ისაუბრა.

„მიმაჩნია, რომ ეს მცდარი ნაბიჯებია, რადგან ისინი ადამიანებს ევრაზიული ეკონომიკური კავშირის წინააღმდეგ განაწყობს. მე, როგორც ევრაზიული ეკონომიკური კავშირის მაღალი რანგის ჩინოვნიკი, მგონია, რომ ეს პრობლემაა, თუმცა ჩვენ ყველა პრობლემას მოვაგვარებთ“, - განაცხადა პრემიერ-მინისტრმა.

ჟურნალისტის კითხვაზე, აღიარებს თუ არა სომხეთი სასოფლო-სამეურნეო პროდუქციასთან დაკავშირებით, კერძოდ ფიტოსანიტარიული კონტროლის სფეროში პრობლემების არსებობას, ფაშინიანი პასუხობს, რომ მსგავსი პრობლემები შესაძლოა ცალკეულ კომპანიებს ჰქონდეთ.

„პრობლემები აქვთ ცალკეულ კომპანიებს და ასეა ყველგან, მათ შორის რუსეთშიც. თუმცა, მთლიანობაში ჩვენ ძალიან კარგი კონტროლის სისტემა გვაქვს და ვაგრძელებთ ჩვენი სასოფლო-სამეურნეო პროდუქციის ხარისხის გაუმჯობესებას“, - აღნიშნა მან.

„როსსელხოზნადზორმა“ ფიტოსანიტარიული მოთხოვნების დარღვევის გამო, 2026 წლის 2 ივნისიდან სომხეთიდან ბლის, გარგარის, ქლიავის, ატმის, ნექტარინისა და ყურძნის იმპორტზე დროებითი შეზღუდვების დაწესების შესახებ გამოაცხადა. მანამდე რუსულმა უწყებამ სომხეთიდან გარკვეული სახეობის ბოსტნეულის იმპორტიც შეზღუდა. დღეს კი ცნობილი გახდა, რომ "როსსელხოზნადზორი" სომხეთიდან ბადრიჯნის, კარტოფილისა და ჩირის იმპორტსაც დროებით კრძალავს. შეზღუდვა გავრცელდება ევრაზიული ეკონომიკური კავშირის (EAEU) წევრ სახელმწიფოებში ამ პროდუქტების ტრანზიტზეც.