ოკუპირებულ აფხაზეთში აცხადებენ, რომ "საწვავის ბაზრის მონაწილეებმა მოახერხეს საქართველოდან მიწოდების შესაძლებლობის პოვნა"

ოკუპირებულ აფხაზეთში აცხადებენ, რომ "საწვავის ბაზრის მონაწილეებმა მოახერხეს საქართველოს ტერიტორიიდან მიწოდების შესაძლებლობის პოვნა", თუმცა კონკრეტულად ვისგან მიიღეს საწვავი ე.წ ხელისუფლების განცხადებაში არაფერია ნათქვამი.

"საწვავის მიწოდება გრძელდება რუსეთის ფედერაციიდან კონტრაქტებით გათვალისწინებულ ფარგლებში, თუმცა გარე ფაქტორებით გამოწვეული შექმნილი გარემოებების გათვალისწინებით, საავტომობილო საწვავი აფხაზეთის რესპუბლიკის საჭიროებებისთვის არასაკმარისია. ამასთან დაკავშირებით, მიღებულ იქნა გადაწყვეტილება ალტერნატიული წყაროებიდან საწვავის მიწოდების შესაძლებლობებზე. საწვავის ბაზრის მონაწილეებმა მოახერხეს საქართველოს ტერიტორიიდან მიწოდების შესაძლებლობის პოვნა", - წერია ე.წ ხელისუფლების განცხადებაში.

დღეს პრემიერმა ირაკლი კობახიძემ განაცხადა, რომ ოკუპირებული აფხაზეთის ტერიტორიაზე საწვავი არა მთავრობამ, არამედ კერძო ბიზნესმა შეიტანა.

მისი თქმით, პროცესი „ოკუპირებული ტერიტორიების შესახებ“ საქართველოს კანონმდებლობის სრული დაცვით განხორციელდა.

„ზოგადად, ასეთ რამეს უშვებს ჩვენი მოქმედი საკანონმდებლო ჩარჩო, მათ შორის „ოკუპაციის შესახებ“ კანონიც. თუ რაიმე ასეთი ნაბიჯი გადაიდგა და გადაიდგმება, ყველა ასეთი ნაბიჯი გადაიდგმება „ოკუპაციის შესახებ“ კანონის ჩარჩოებში. ჩვენ თუ შეგვიძლია მათ შორის, აფხაზეთში მცხოვრებ მოსახლეობას შევუმსუბუქოთ მდგომარეობა, ამასაც გავაკეთებთ, ოღონდ გავაკეთებთ „ოკუპაციის შესახებ“ კანონის ჩარჩოებში“, - განაცხადა კობახიძემ და დაამატა, რომ სახელმწიფო უწყებებს საწვავი უშუალოდ არ გაუგზავნიათ და პროცესში კერძო სექტორი მონაწილეობდა.

„რაც შეეხება საწვავის შეტანას, ჩვენ არ შეგვიტანია, ბიზნესმა შეიტანა. თუ ჩვენ გვექნება მომავალშიც იმის საშუალება, რომ იქ მცხოვრებ მოსახლეობას, ქართულ თუ აფხაზურ მოსახლეობას, შევუმსუბუქოთ მდგომარეობა, მომავალშიც გავაკეთებთ“, - განაცხადა კობახიძემ.