"ომ ჰიდრო" მაგანა ჰესის მშენებლობას გეგმავს - მთავრობამ PPP პროექტი მოიწონა
კომპანია „ომ ჰიდრო“ ენერგეტიკული პროექტის „მაგანა ჰესის“ განხორციელებას გეგმავს - ამის შესახებ მთავრობის 1 468-ე განკარგულებიდან ხდება ცნობილი.
დოკუმენტის მიხედვით, მთავრობამ ცნობად მიიღო და მოიწონა პოტენციურ საჯარო და კერძო თანამშრომლობის პროექტად [PPP] იდენტიფიცირებული “მაგანა ჰესის“ ელექტროსადგურის პროექტის კონცეფცია, რომელიც მთავრობამ ეკონომიკისა და მდგრადი განვითარების სამინისტრომ წარუდგინა.
მთავრობამ სამინისტროს დაავალა კომპანია „ომ ჰიდროს“ „მაგანა ჰესის“ პროექტის მოსამზადებელი სამუშაოები ანუ კვლევები მოამზადოს, რასაც PPP პროექტების კანონმდებლობა ითვალისწინებს.
ამასთან, განკარგულების მიხედვით, მთავრობამ მოიწონა შპს „ომ ჰიდროსთან“ დასადები ხელშეკრულება, რომელიც მოსამზადებელი სამუშაოების ჩატარებას და სრული ტექნიკურ-ეკონომიკური კვლევის მთავრობისთვის წარდგენას ეხება. ხელშეკრულების გაფორმება ეკონომიკისა და მდგრადი განვითარების სამინისტროს დაევალა. მთავრობის სახელით მასზე ხელმოწერის უფლებამოსილება ეკონომიკისა და მდგრადი განვითარების მინისტრს მიენიჭა.
ცნობისთვის, „მაგანა ჰესის“ პროექტი იყო ერთ-ერთი იმ 24 საინვესტიციო ენერგოპროექტებს შორის, რომელიც 2023 წლის მაისში CFD აუქციონში გამარჯვებულად გამოცხადდა. ჰესის სიმძლავრე 4.5 მგვტ უნდა იყოს.
ბიზნეს რეესტრის მიხედვით, კომპანია „ომ ჰიდრო“ 2023 წელსაა რეგისტრირებული და მისი 100%-იანი წილის მფლობელი მერაბ ახვლედიანია.
BM.GE
წყარო: bm.ge