OPEC+-მა დეკემბერში ნავთობის მოპოვების კვოტები უცვლელად დატოვა

OPEC+-ის წევრმა ქვეყნებმა დღეს, 1-ელ ნოემბერს მიღებული გადაწყვეტილებით დეკემბრისთვის ნავთობის მოპოვების სამიზნე მაჩვენებლები უცვლელად დატოვეს. საერთაშორისო მედია წერს, რომ ამით დადასტურდა მოლოდინი, რომ პოლიტიკის შემდგომი კორექტირება მომავალ წლამდე არ მოხდება, სანამ ჯგუფი ირანის ომით გამოწვეულ საექსპორტო შეფერხებებს ებრძვის.

შესაბამისი გადაწყვეტილება ონლაინ შეხვედრაზე OPEC+-ის შვიდმა ძირითადმა წევრმა: საუდის არაბეთმა, რუსეთმა, ერაყმა, ქუვეითმა, ალჟირმა, ყაზახეთმა და ომანმა მიიღო. მიუხედავად იმისა, რომ სპარსეთის ყურის ქვეყნებმა გაზარდეს ექსპორტი, რომელიც თვეების განმავლობაში კონფლიქტის გამო შეფერხებული იყო, მათი უმეტესობა მაინც დადგენილ მიზნობრივ მაჩვენებლებზე ბევრად ნაკლებ ნავთობს მოიპოვებს.

პარასკევს ნავთობის ფასები 2%-ზე მეტით გაიზარდა. Brent-ის ტიპის ნავთობის ფასმა ბარელზე თითქმის 118 დოლარს მიაღწია, რაც აპრილის შემდეგ ყველაზე მაღალი მაჩვენებელია. ფასების ზრდა უკავშირდება ტრეიდერების მოლოდინს, რომ აშშ-ის შუალედური არჩევნების შემდეგ ირანის ომი შესაძლოა კიდევ უფრო გააძლიეროს.

შვიდმა წევრმა ქვეყანამ 2026 წლის განმავლობაში მოპოვების სამიზნე მაჩვენებლები გაზარდა და სექტემბერში დაასრულა დღეში 1.65 მილიონი ბარელით შემცირებული მიწოდების ეტაპობრივი აღდგენა, რაზეც შეთანხმება პირველად 2023 წელს შედგა. ოქტომბრისა და ნოემბრის შეხვედრებზე მათ ეს მაჩვენებლები უცვლელად დატოვეს.

ამასთან, OPEC+-ს ჯერ კიდევ მოქმედებაში აქვს მოპოვების შეზღუდვის კიდევ ერთი ეტაპი, დღეში დაახლოებით 2 მილიონი ბარელის ოდენობით, რაც წევრების უმეტესობას 2026 წლის ბოლომდე ეხება.