OpenAI-მ უპრეცედენტო კიბერინციდენტი აღიარა - AI-აგენტმა ტესტირებისას დაცული სისტემები გატეხა

OpenAI-ის მიერ ჩატარებული უსაფრთხოების ტესტირებისას, კომპანიის დამოუკიდებლად მოქმედმა აგენტმა უსაფრთხოების სისტემები გაარღვია და ინტერნეტში უნებართვოდ შევიდა. შედეგად, ხელოვნური ინტელექტის მოდელმა პლატფორმა Hugging Face-ის ინფრასტრუქტურა გატეხა. არსებული ინფორმაციით, ინციდენტი უახლესი მოდელების იზოლირებულ გარემოში გამოცდისას მოხდა, რა დროსაც აგენტმა დასახული ტესტირების მიზნის მისაღწევად დაცვის ბარიერები დამოუკიდებლად გადალახა. Reuters-ის ცნობით, OpenAI-ში მომხდარი უპრეცედენტო კიბერინციდენტად გამოაცხადეს და დაცვის მექანიზმების გაძლიერება დაიწყეს.

მომხდარს Hugging Face-ის თანადამფუძნებელი, კლემან დელანგი უკვე გამოეხმაურა. დელანგის თქმით, კომპანია თავიდანვე ვარაუდობდა, რომ თავდასხმა წამყვანი ლაბორატორიიდან განხორციელდა. მანამდე პლატფორმის წარმომადგენლებმა განაცხადეს, რომ დაფიქსირებული შეტევა ყველა ადრინდელი ინციდენტისგან განსხვავდებოდა, რადგან პროცესს მთლიანად დამოუკიდებლად მოქმედი ხელოვნური ინტელექტი მართავდა.

მნიშვნელოვანია ითქვას, რომ მომხდარმა პოლიტიკოსებსა და სფეროს სპეციალისტებში სერიოზული შეშფოთება გამოიწვია. აშშ-ის კონგრესმენმა გრეგ კასარმა განაცხადა, რომ ტექნოლოგია სტარტაპმა უსაფრთხოების მკაცრი რეგულაციების გარეშე განავითარა და რომ საჭიროა სავალდებულო დამოუკიდებელი ტესტირების კიდევ უფრო გამკაცრება.

თავის მხრივ, უსაფრთხოების კომპანია Luta Security-ის ხელმძღვანელმა ქეითი მუსურისმა აღნიშნა, რომ ლაბორატორიებმა და სახელმწიფო უწყებებმა მსგავსი სისტემების მონიტორინგისა და შეკავების ეფექტური მექანიზმები უნდა შექმნან.

ცნობისთვის, Hugging Face-ი ხელოვნური ინტელექტის ღია კოდის მოდელებისა და მონაცემთა ბაზების ჰოსტინგის უმსხვილესი პლატფორმაა.