ოპოზიციური პარტიების აკრძალვა ევროპის საბჭოს ისტორიაში უპრეცედენტო იქნება - პაველ ჰერჩინსკი

საქართველოში ევროკავშირის ელჩის, პაველ ჰერჩინსკის განცხადებით, ყველა იმ ოპოზიციური პარტიის აკრძალვის მცდელობა, რომლებმაც წინა საპარლამენტო არჩევნებზე საარჩევნო ბარიერი გადალახეს, ევროპის საბჭოს ისტორიაში უპრეცედენტო იქნება.

ამის შესახებ ჰერჩინსკიმ პრესკონფერენციაზე განაცხადა. ელჩის თქმით, ევროკავშირი დიდი შეშფოთებით აკვირდება საქართველოს საკონსტიტუციო სასამართლოში მიმდინარე პროცესს, რომელიც ოპოზიციური პარტიების აკრძალვას უკავშირდება.

„არ მინდა ისეთ რამეზე სპეკულირება, რაც ჯერ არ მომხდარა. დიდი შეშფოთებით ვადევნებთ თვალს საქართველოს საკონსტიტუციო სასამართლოში მიმდინარე სასამართლო პროცესს.

ევროკომისიის სპიკერმა რამდენიმე დღის წინ გამოთქვა ევროკომისიის პოზიცია. ევროკომისარმა კოსმა მისი პრესკონფერენციის დროს ძალიან ნათლად თქვა: „საკონსტიტუციო სასამართლოში სარჩელით მთავარი ოპოზიციური პარტიების აკრძალვის მცდელობები საფრთხეს უქმნის ქვეყნის დემოკრატიის საფუძველს“.

ჰერჩინსკის განცხადებით, ევროპის საბჭოს წევრ ქვეყნებს შორის მსგავსი პრეცედენტი არ არსებობს და ოპოზიციური პარტიების აკრძალვა ორგანიზაციის ისტორიაში უპრეცედენტო იქნება.

„ჩემი მხრიდან შემიძლია დავამატო, რომ როდესაც ევროპის საბჭოს ყველა წევრს უყურებ, და საქართველო ერთ-ერთია მათგან, ყველა ოპოზიციური პარტიის აკრძალვის მცდელობა, რომლებმაც საპარლამენტო ზღვარი გადალახეს წინა საპარლამენტო არჩევნების დროს, მათ შორის იმის, რომელიც პარლამენტში ზის, უპრეცედენტო იქნება ევროპის საბჭოს ისტორიაში,“ - განაცხადა ჰერჩინსკიმ.

საკონსტიტუციო სასამართლო 21 ოქტომბერს დაიწყო ხუთი ოპოზიციური პარტიის აკრძალვის საქმის განხილვა, რომლის ინიციატორიც მმართველი პარტია „ქართული ოცნებაა“.

24 სექტემბერს „ქართულმა ოცნებამ“ საკონსტიტუციო სასამართლოში განახლებული სარჩელი შეიტანა: „ნაციონალური მოძრაობის“, „კოალიცია ცვლილებისთვის“, „ლელო - ძლიერი საქართველოსა“ და „ფედერალისტების“ მსგავსად, „გახარია - საქართველოსთვის“ აკრძალვაც მოითხოვა.