
ოქტომბერში საქართველოში $288 მილიონის ფულადი გზავნილი გადმოირიცხა - ქვეყნების რეიტინგი
2026 წლის ოქტომბერში საქართველოში შემოსული ფულადი გზავნილების მოცულობამ 288.56 მლნ აშშ დოლარი (750.1 მლნ ლარი) შეადგინა. ეროვნული ბანკის მონაცემებით, ეს 2025 წლის ოქტომბრის ანალოგიურ მაჩვენებელზე 9.5%-ით, ანუ 30.1 მლნ აშშ დოლარით ნაკლებია.
ქვეყნების მიხედვით, ფულადი გზავნილების ყველაზე დიდი მოცულობა აშშ-დან განხორციელდა. ოქტომბერში ამ ქვეყნიდან საქართველოში 65.1 მლნ აშშ დოლარი ჩაირიცხა, რაც მთლიანი გზავნილების 22.56%-ს შეადგენს. წლიურ ჭრილში აშშ-დან გადმორიცხვები 9.83%-ით გაიზარდა.
მეორე ადგილზე იტალია იმყოფება, საიდანაც 52.4 მლნ აშშ დოლარი გადმოირიცხა. ეს მთლიანი გზავნილების 18.16%-ია, წლიური კლება კი 1.45%-ს შეადგენს. მესამე პოზიციას გერმანია იკავებს 30.47 მლნ აშშ დოლარით, რაც წლიურად 2.94%-იანი ზრდაა.
ფულადი გზავნილების მოცულობით ტოპ ხუთეულში ასევე შედიან საბერძნეთი და ისრაელი. საბერძნეთიდან ოქტომბერში 26.93 მლნ აშშ დოლარი ჩაირიცხა, რაც წლიურად 4.33%-ით მეტია, ხოლო ისრაელიდან მიღებულმა გზავნილებმა 25.82 მლნ აშშ დოლარი შეადგინა, წლიური ზრდით 7.31%.
მნიშვნელოვანი კლება კვლავ რუსეთის ფედერაციიდან განხორციელებულ გზავნილებში დაფიქსირდა. ოქტომბერში რუსეთიდან საქართველოში 11.22 მლნ აშშ დოლარი გადმოირიცხა, რაც გასული წლის ანალოგიურ პერიოდთან შედარებით 72.84%-ით ნაკლებია
თუმცა სავარაუდოდ, ნოემბრიდან რუსული ფულადი გზავნილები აღარ იქნება ასე მკვეთრად შემცირებული, რადგან გასული კვირის ბოლოდან საქართველოში Zolotaya Korona-მ საქმიანობა აღადგინა. გზავნილების აღნიშნული სისტემა მისი შუამავალი პროვაიდერის სანქცირების გამო, სამ თვეზე მეტი ხნის განმავლობაში საქართველოში არ ოპერირებდა.
# ქვეყანა გზავნილები (მლნ აშშ დოლარი) წლიური ცვლილება 1 აშშ 65.1 9.8% 2 იტალია 52.4 -1.5% 3 გერმანია 30.47 2.9% 4 საბერძნეთი 26.93 4.3% 5 ისრაელი 25.82 7.3% 6 თურქეთი 11.43 6.7% 7 რუსეთის ფედერაცია 11.22 -72.8% 8 ესპანეთი 7.71 -2.6% 9 გაერთიანებული სამეფო 6.07 15.3% 10 საფრანგეთი 5.82 -6.1%
BM.GE
წყარო: bm.ge