პატრიარქის არჩევნების გამო სამების ტაძრის მიმდებარედ მოძრაობა შეზღუდულია

საქართველოს მართლმადიდებელი ეკლესიის პატრიარქის არჩევნებთან დაკავშირებით, დღეს, 11 მაისს, სამების საკათედრო ტაძრის მიმდებარე ტერიტორიაზე საავტომობილო მოძრაობა დროებით შეზღუდულია.

შინაგან საქმეთა სამინისტროს ინფორმაციით, შეზღუდვები დილის 09:00 საათიდან ამოქმედდა და 18:00 საათამდე გასტანს. ამ დროისთვის ტრანსპორტის გადაადგილება აკრძალულია შემდეგ მიმართულებებზე:

• ბუხაიძის ქუჩა: მოძრაობა ჩაკეტილია სამრეკლოს ქუჩის მიმართულებით. თავად ბუხაიძის ქუჩაზე გადაადგილება მხოლოდ ქვეითად მოსიარულეებისთვისაა ნებადართული; • ახვლედიანის მოედანი და აღმართი: საავტომობილო მოძრაობა სრულად შეზღუდულია; • ნიაბის ქუჩა: მოძრაობა აკრძალულია გუმბრის ქუჩის მიმართულებით; • მეტრო „ავლაბარი“: მოძრაობა შეზღუდულია გონაშვილის ქუჩიდან მესხიშვილის ქუჩის მიმართულებით.

უწყების ცნობით, ავტომანქანების საპარკინგე სივრცეები მოწყობილია ახვლედიანის მოედანსა და ხეთაგუროვის ქუჩაზე.

მოქალაქეებს, რომლებიც პარკირებით ისარგებლებენ, სამების ტაძრამდე მისვლა სპეციალურად გამოყოფილი მიკროავტობუსებით ან ფეხით (ახვლედიანის ქუჩის გავლით) შეუძლიათ. მეტროსადგურ „ავლაბრიდან“ ამოსული მგზავრები კი ტაძრისკენ გადაადგილებას გონაშვილის ქუჩით ახერხებენ.