პეტერ მადიარი უნგრეთის პრემიერ-მინისტრი ოფიციალურად გახდა

ორბანის 16-წლიანი მმართველობის შემდეგ, უნგრეთს ახალი პრემიერ-მინისტრი პეტერ მადიარი ჰყავს. პროევროპელი ცენტრისტ-მემარჯვენე ლიდერმა, პეტერ მადიარმა, უნგრეთის პრემიერ-მინისტრის ფიცი დადო.

ერთი თვის წინ მადიარის ოპოზიციური პარტიის „ტისას“ მიერ საპარლამენტო არჩევნებში გამარჯვების შემდეგ დღეს, ბუდაპეშტში ინაუგურაციის ცერემონია გაიმართა.

ფიცის დადებიდან რამდენიმე წუთში მადიარმა განაცხადა, რომ უნგრელებმა მის პარტიას მისცეს მანდატი ქვეყნის ისტორიაში „ახალი თავის“ დასაწყებად: „ეს არის მანდატი არა მხოლოდ მთავრობის, არამედ სისტემის შესაცვლელად. ყველაფრის თავიდან დასაწყებად“, - განაცხადა მან.

მისი თქმით, ორბანის მმართველობის პერიოდში უნგრეთი ევროკავშირის ყველაზე კორუმპირებულ ქვეყნად იქცა. „ორბანის მოკავშირეებსა და ელიტას დიდი გზა აქვთ გასავლელი მანამ, სანამ პირისპირ შეეჩეხებიან იმას, რაც ჩაიდინეს“, - განაცხადა მან და პირობა დადო, რომ მისი მთავრობა სამართალს აღასრულებს მათ წინააღმდეგ, ვინც ბოლო საათებშიც კი „ყველაფრის მოპარვას“ ცდილობდა.

მან კიდევ ერთხელ გაიმეორა მოწოდება ორბანის ეპოქაში დანიშნული პირების გადადგომის შესახებ და სთხოვა მათ, ეს თვის ბოლომდე გააკეთონ. მისი თქმით, პირველი უნდა იყოს ტამაშ შუიოკი. The Guardian-ი წერს, რომ ამით მან მიანიშნა პრეზიდენტზე, რომელმაც რამდენიმე წუთით ადრე მადიარი მთავრობის ფორმირებისთვის წარადგინა. პარლამენტის გარეთ ამ კომენტარს ენთუზიაზმით სავსე ოვაციები მოჰყვა.

პეტერ მადიარი ხალხს უფრო ინკლუზიური უნგრეთის მშენებლობას დაჰპირდა, რომელიც იქნება უფრო თავისუფალი, ჰუმანური და იმედისმომცემი, ვიდრე ორბანის ნაციონალისტური მოძრაობის დროს იყო. „ის, რაც გვაერთიანებს, უფრო ძლიერი იქნება, ვიდრე ის, რაც გვყოფს. უნგრეთი იქნება სახლი ყოველი უნგრელისთვის და ყველას შეეძლება იგრძნოს, რომ მას აქვს ადგილი უნგრელ ერში. ოჯახები, მეგობრები და თემები კვლავ შეძლებენ ერთმანეთთან საუბარს“, - განაცხადა მადიარმა.