ქართველ გადამზიდავებს რუსეთში ყოფნის ვადა 180 დღემდე გაეზრდებათ

დსთ-ს ქვეყნებიდან და საქართველოდან საერთაშორისო საავტომობილო გადაზიდვებში ჩართული მძღოლებისთვის რუსეთში ყოფნის მაქსიმალური ვადა 90-დან 180 დღემდე გაიზარდა.

პრემიერ-მინისტრის მიხეილ მიშუსტინის 27 აპრილს გამოქვეყნებულ დადგენილებაში წერია, რომ რუსეთში ხანგრძლივი ყოფნის (180 დღე) უფლების მისაღებად უცხოელმა მძღოლებმა დამატებითი დოკუმენტაცია უნდა წარადგინონ. ახალი წესი ძალაში 30 ივნისიდან შევა.

აღსანიშნავია, რომ მანამდე ქართველ გადამზიდავებს მხოლოდ 90 დღით გაჩერება შეეძლოთ. კერძოდ, 2025 წლის იანვრიდან რუსეთში მიგრაციის შესახებ კანონმდებლობაში ცვლილებები შევიდა, რომლის მიხედვითაც რეგისტრაციის გარეშე უცხოელი მოქალაქეების ყოფნის ვადა წლის განმავლობაში 180-დან 90 დღემდე შემცირდა.

სატრანსპორტო დერეფნის კვლევის ცენტრის შეფასებით, იმიგრაციის პროცესის უკან დაბრუნებით რუსეთმა ფაქტობრივად მისი პოლიტიკის „სისტემური კრახი“ აღიარა და საკუთარი ლოგისტიკის გამოსწორების მიმართულებით იძულებითი ნაბიჯი გადადგა.