რა დაიბომბა უკრაინა-რუსეთის მიერ გასული დღე-ღამის განმავლობაში?

გასულ ღამეს, რუსეთისა და უკრაინის მიერ ერთმანეთის მისამართით განხორციელებულმა იერიშებმა მოსკოვის რეგიონსა და უკრაინის ოლქებში ენერგეტიკული და სატრანსპორტო ინფრასტრუქტურა მნიშვნელოვნად დააზიანა.

როგორც ირკვევა, რუსეთის დედაქალაქში მთავარი ზიანი ნავთობგადასამუშავებელ საწარმოსა და მსხვილ ლოგისტიკურ ცენტრს მიადგა. თავის მხრივ, რუსულმა არმიამ უკრაინის რამდენიმე რეგიონში საცხოვრებელი ნაგებობები, სატრანსპორტო კვანძები და ენერგეტიკული ობიექტები დაბომბა.

მოსკოვის ოლქში ყველაზე დიდი ზარალი ქალაქის მთავარ ნავთობგადასამუშავებელ ქარხანას მიადგა. უკრაინული მხარის ინფორმაციით, უპილოტო საფრენი აპარატებისა და ფრთოსანი რაკეტების დარტყმის შედეგად საწარმოს სამი საკვანძო ტექნოლოგიური დანადგარი დაზიანდა. ქალაქის ტერიტორიაზე არსებული მსხვილი სასაწყობო ფართი და ლოგისტიკური ცენტრი კი გაჩენილმა ხანძარმა გაანადგურა.

წარმატებით განხორციელებულ დარტყმებს უკრაინის პრეზიდენტი, ვოლოდიმირ ზელენსკი სოციალურ ქსელში გამოეხმაურა:

"გასულ ღამეს ჩვენმა შორი მოქმედების საპასუხო დარტყმებმა ძალიან მნიშვნელოვანი შედეგი გამოიყო მოსკოვის რეგიონში. ზიანი მიადგა რუსეთის ნავთობინდუსტრიის ერთ-ერთ საკვანძო ობიექტსა და აგრესორის ლოგისტიკურ ჰაბს. საუბარია მილიარდობით დოლარზე, რომელიც ომის მანქანას კვებავს. შეტევისთვის გამოვიყენეთ: FP-1, RZ-100, MICH-2000, Palianytsia, Vendetta, Liutyi, Bars-ი Flamingo, Sichen-ი და Pelican-ი.

მადლობას ვუხდი ჩვენს მეომრებს სიზუსტისთვის!"

აღსანიშნავია, რომ უკრაინულმა დარტყმებმა მოსკოვის რეგიონში სხვა ინფრასტრუქტურაც დააზიანა. დრონების მასშტაბური შეტევის გამო შერემეტევოსა და ვნუკოვოს საერთაშორისო აეროპორტებმა ფრენების მიღება და გაფრენა დროებით შეაჩერეს. საჰაერო იერიშის ტალღამ სოფიინოსა და ორეხოვო-ზუევოში მრავალსართულიანი საცხოვრებელი კორპუსი და კერძო სახლიც დააზიანა.

რაც შეეხება უკრაინას, რუსეთის საჰაერო ძალებმა მიზანში ქვეყნის ენერგომომარაგების, ტრანსპორტისა და ლოგისტიკის ობიექტები ამოიღეს. კიევის ოლქში, კერძოდ ქალაქ ფასტოვში, საჰაერო იერიშმა კერძო საცხოვრებელი სახლი დაანგრია. დედაქალაქის სხვადასხვა რაიონში კი საცხოვრებელ ზონებს ჩამოგდებული დრონების ნამსხვრევები დაეცა. ამასთან, ხერსონის რეგიონში რუსული უპილოტო საფრენი აპარატი სამონასტრო კომპლექსს დაეცა და შენობა დააზიანა. სუმის ოლქში კი რუსული თავდასხმის შედეგად სამოქალაქო სატრანსპორტო საშუალება განადგურდა.

ცნობისთვის, დაზიანებული ნავთობგადასამუშავებელი ქარხანა მოსკოვის რეგიონის საწვავის მოთხოვნის მესამედზე მეტს აკმაყოფილებს. ეს საწარმო დედაქალაქს, სამოქალაქო ავიაციასა და რუსულ სამხედრო ფორმირებებს ბენზინით, დიზელითა და საავიაციო საწვავით ამარაგებდა.