რა ქონებას ფლობს ლილუაშვილის ყოფილი მოადგილე ლევან ახობაძე, რომელიც ₾250,000-ის ქრთამზე დააკავეს
დღეს ქრთამის აღების ბრალდებით სახელმწიფო უსაფრთხოების სამსახურის უფროსის, გრიგოლ ლილუაშვილის ყოფილი მოადგილე, ლევან ახობაძე დააკავეს. ის ამ თანამდებობას 2021 წლიდან 2025 წლის აპრილამდე იკავებდა. სუს-ის ანტიკორუფციული სამსახურის ინფორმაციით, ახობაძემ 2024 წლის აპრილში ქრთამის სახით აიღო ნაღდი ფული 250,000 ლარის ოდენობით, რაც საქართველოს სახელმწიფო საზღვარზე 40 მილიონი რუბლის გატარების საქმეს უკავშირდებოდა.
2025 წლის ამსახველი ქონებრივი დეკლარაციის თანახმად, ახობაძის წლიური ანაზღაურება 136,000 ლარს შეადგენდა, რაც თვეში 11,300 ლარს შეადგენს. რაც შეეხება საბანკო ანგარიშებს, დოკუმენტის თანახმად, ახობაძის საბანკო ანგარიშებზე ჯამურად 10,000 ლარზე ნაკლები თანხა იყო განთავსებული, ამასთან დეკლარაციის მიხედვით, მან მამისგან 12,000 დოლარის საჩუქარი მიიღო.
რაც შეეხება უძრავ ქონებას, ლევან ახობაძე თბილისში ფლობს ერთ ბინას 125 კვადრატული მეტრის ფართობით ჭყონდიდელის ქუჩაზე, რომელიც დეკლარაციის თანახმად, 2020 წელს, 72 ათას დოლარად, იპოთეკური კრედიტით იყო შეძენილი.
ახობაძე ასევე არის რამდენიმე მიწის ნაკვეთს თანამფლობელი მისი ოჯახის წევრებთან ერთად ვანის მუნიციპალიტეტ მთისძირში, რომლის მიღებაც 1995 წელს მოხდა. ეს მოიცავს 3000; 1200; 2100; 2200 და 1400 კვადრატულ მეტრს. ქონებრივი დეკლარაციის თანახმად, ლევან ახობაძის მეუღლე თათია კაჭარავა ფლობს 599 კვადრატული მეტრის მიწის ნაკვეთს ჟინვალში, რაც 2011 წელს მემკვიდრეობით მიიღო.
დეკლარაციის თანახმად, ლევან ახობაძე ემსახურებოდა ორ იპოთეკურ სესხს - 130 ათასი ლარის და 97 ათასი ევროს ოდენობით, თუმცა არაა მითითებული თუ რომელ ქონებაზე იყო მეორე იპოთეკური სესხი, პირველ სესხზე მისი ხარჯი 2025 წელს 27 ათას ლარს, მეორე სესხზე კი 9.4 ათას ევროს შეადგენდა.