რა შემოსავალი აქვს "თელასის" ჯგუფს, რომლის 75%-საც EU-ის მიერ სანქცირებული Inter Rao ფლობს
საქართველოში რუსეთის სახელმწიფო ენერგოკომპანია Inter Rao "თელასის" ჯგუფის 75.47%-ის მფლობელია. თავის მხრივ, ევროკავშირის სანქციების 21-ე პაკეტით Inter Rao-ს წინააღმდეგ ფინანსური სანქციები ამოქმედდა.
არსებული მდგომარეობით, "თელასმა" და მასთან დაკავშირებულმა "თბილისის ელექტრომიმწოდებელმა კომპანიამ" (თელმიკომ) 2025 წლის ფინანსური შედეგები უკვე წარადგინეს, რომელთა მიხედვითაც კომპანიების აქტივების ჯამური ღირებულება 970 მილიონ ლარს აღემატება, აქედან "თელასის" აქტივები 694.8 მილიონი ლარი იყო, ხოლო თელმიკოს - 275.8 მილიონი ლარი.
2025 წლის აუდიტირებული ფინანსური ანგარიშგებების მიხედვით, "თელასმა" 76 მილიონი ლარის წმინდა მოგება მიიღო, ხოლო "თელმიკომ" 53.7 მილიონი ლარის წმინდა ზარალი დააფიქსირა.
2020 წელს ელექტროენერგიის ბაზრის რეფორმის ფარგლებში განხორციელებული რეორგანიზაციის შედეგად, განაწილებისა და მიწოდების საქმიანობები ერთმანეთისგან გაიმიჯნა.
ამ ცვლილებების შემდეგ, "თელასი" დარჩა თბილისის ელექტროგამანაწილებელი ქსელის ოპერატორად, ხოლო თბილისის ელექტრომიმწოდებელი კომპანია (თელმიკო) ჩამოყალიბდა უნივერსალურ მიმწოდებლად, რომელიც დედაქალაქის საყოფაცხოვრებო მომხმარებლებსა და შესაბამის კატეგორიას მიკუთვნებულ იურიდიულ პირებს ელექტროენერგიით ამარაგებს.
2025 წლის ბოლოსთვის "თელმიკოს" 762 454 აბონენტი ჰყავდა, რაც მას საქართველოში ელექტროენერგიის ერთ-ერთ უმსხვილეს მიმწოდებლად აქცევს. ამავე პერიოდში "თელმიკოს" აქტივების მოცულობა 275.8 მილიონ ლარს შეადგენდა, ხოლო "თელასის" აქტივები 694.8 მილიონ ლარს აღწევდა.
ფინანსური ანგარიშგების მიხედვით, 2025 წელს "თელმიკოს" შემოსავალმა მომხმარებლებთან გაფორმებული ხელშეკრულებებიდან 707.1 მილიონი ლარი შეადგინა.
ამავე პერიოდში კომპანიის ელექტროენერგიის შესყიდვისა და მასთან დაკავშირებული მომსახურებების ხარჯები 771.8 მილიონ ლარამდე გაიზარდა.