რატომ არ მუშაობს ლეგალური დასაქმების პროგრამა გერმანიის გარდა სხვა ქვეყნებში? - მინისტრის მოადგილის პასუხი
ჯანდაცვის მინისტრის მოადგილე გიორგი ცაგარეიშვილი იმ ფაქტს, რომ ცირკულარული მიგრაციის პროგრამა გერმანიის გარდა სხვა ქვეყნებთან პრაქტიკულად არ მოქმედებს, თავად ამ ქვეყნებიდან ნაკლებ აქტიურობას უკავშირებს.
საქმე ისაა, რომ ცირკულარული შრომითი მიგრაციის მიმართულებით ხელშეკრულებები და შესაბამისი ოქმები 4 პარტნიორ ქვეყანასთან, კერძოდ: გერმანიასთან, ისრაელთან, საფრანგეთთან და ბულგარეთთანაა გაფორმებული, თუმცა მოქალაქეები მხოლოდ გერმანიაში საქმდებიან. BMG დაინტერესდა, რა არის ამის მიზეზი, რაზეც მინისტრის მოადგილემ შემდეგი განმარტება გააკეთა:
"იყო გერმანული მხარის აქტიური ჩართულობა, შესაბამისად მოთხოვნაც იყო, წინა წლებში ჩვენ გარკვეული სამუშაოები ჩავატარეთ და ამ პროგრამებით 2000-მდე საქართველოს მოქალაქე სარგებლობდა. დღესდღეობით, 1500-მდე საქართველოს მოქალაქე სარგებლობს. უკვე იქ ჩასული ჩვენი ქვეყნის მოქალაქეები ინდივიდუალურ კავშირებს ამყარებენ გერმანელ დამსაქმებლებთან, მაგრამ ჩვენ ყოველ შემთხვევაში გერმანიის ფედერაციული რესპუბლიკის მთავრობა შესაბამისი უწყება გვაწვდის იმას თუ რამდენი საქართველოს მოქალაქეა ლეგალურად ამ პროგრამის საფუძველზე, ანუ შეთანხმებიდან გამომდინარე დასაქმებული.
რამდენიმე ქვეყანასთან ამგვარი შეთანხმებები არის, მაგრამ ისინიც არ აქტიურობენ და ჩვენც სხვადასხვა ქვეყანაში ზოგადად მიმდინარე პროცესებს ვაკვირდებით. ზოგიერთ ქვეყანას არ უნდა, არ აწყობს, არ სურს, არა მხოლოდ საქართველოდან, არამედ არსაიდან, რომ მასთან ლეგალურად ჩავიდნენ ადამიანები და დასაქმდნენ, იცავენ თავიანთ შრომის ბაზარს და ამაში ცუდი არაფერია. ჩვენც თუ დავკავდებით აღნიშნულით, კარგი იქნება", - აღნიშნა მან.
გერმანიაში 1448 მოქალაქე დასაქმდა - რომელ ქვეყნებთან მუშაობს საქართველო ლეგალურ მიგრაციაზე?
BM.GE
წყარო: bm.ge