რატომ გადაწყდა რუსთაველზე მოძრაობის სრულად შეზღუდვა ეტაპობრივის ნაცვლად?|მერიის განმარტება
თბილისის მერიაში აცხადებენ, რომ რუსთაველის გამზირზე სამუშაოების ეტაპობრივად, მოძრაობის ნაწილობრივი შენარჩუნების პირობებში წარმოება, სარეაბილიტაციო პროცესს მნიშვნელოვნად გაახანგრძლივებდა.
ასე უპასუხეს დედაქალაქის მთავრობაში BMG-ის მიერ დასმულ კითხვას, რომელსაც ბოლო დღეებში, სოციალურ ქსელში მოქალაქეები ხშირად სვამენ. კერძოდ, რატომ გადაწყდა რუსთაველის გამზირზე საავტომობილო მოძრაობის სრულად შეზღუდვა, რაც ტრანსპორტის მოძრაობას აფერხებს.
თბილისის მერიაში ირწმუნებიან, რომ საავტომობილო მოძრაობის დროებითი სრულად შეზღუდვა ინფრასტრუქტურული სამუშაოების მაქსიმალურად სწრაფი ტემპით შესრულების საშუალებას იძლევა.
"მოგეხსენებათ, რუსთაველის გამზირზე მასშტაბური სარეაბილიტაციო სამუშაოები მიმდინარეობს.
მსგავსი მოცულობისა და სირთულის ინფრასტრუქტურული პროექტი აღნიშნულ გამზირზე პრაქტიკულად პირველად ხორციელდება.
სამუშაოების მასშტაბის, სპეციფიკისა და პროექტით განსაზღვრული ვადების გათვალისწინებით, მიღებულ იქნა გადაწყვეტილება, სარეაბილიტაციო არეალზე საავტომობილო მოძრაობა სრულად შეზღუდულიყო. სამუშაოების ეტაპობრივად, მოძრაობის ნაწილობრივი შენარჩუნების პირობებში წარმოება მნიშვნელოვნად გაახანგრძლივებდა სარეაბილიტაციო პროცესს, შეაფერხებდა სამშენებლო სამუშაოების უწყვეტ რეჟიმში შესრულებას.
საავტომობილო მოძრაობის დროებითი სრულად შეზღუდვა, კი საშუალებას გვაძლევს მაქსიმალურად სწრაფი ტემპით ვაწარმოოთ გამზირზე დაგეგმილი ინფრასტრუქტურული სამუშაოები", - უთხრეს BMG-ის თბილისის მერიაში.
ცნობისთვის: 23 ივლისიდან, თბილისში რუსთაველის გამზირის სრული რეაბილიტაცია დაიწყო. თბილისის მერიის ინფორმაციით, სამუშაოები ოთხი თვის განმავლობაში გაგრძელდება, რა პერიოდშიც ქალაქის მთავარ გამზირზე, ასევე მერაბ კოსტავას ქუჩის ნაწილზე, ყველა ტიპის სატრანსპორტო საშუალების მოძრაობა შეიზღუდა.