რატომ შეწყვიტა ამერიკამ ინდოელი მილიარდერის, გაუტამ ადანის წინააღმდეგ გამოძიება?

პრეზიდენტ დონალდ ტრამპის ადმინისტრაციამ ინდოელი მილიარდერის, გაუტამ ადანის წინააღმდეგ თაღლითობის მუხლით აღძრული სისხლის სამართლის საქმის გაუქმების და გამოძიების შეწყვეტის გადაწყვეტილება მიიღო.

ბიზნესმენს ინდოეთში მზის ელექტროსადგურის პროექტის მოსაპოვებლად ადგილობრივი პოლიტიკოსების $265 მილიონით მოსყიდვასა და ამერიკელი ინვესტორების მოტყუებაში სდებდნენ ბრალს, რასაც მისი კომპანია კატეგორიულად უარყოფდა.

აღსანიშნავია, რომ იუსტიციის დეპარტამენტმა საქმის შეწყვეტის გადაწყვეტილება მას შემდეგ მიიღო, რაც ინდოელმა მეწარმემ აშშ-ის ეკონომიკაში $10 მილიარდის ოდენობის ინვესტიციის განხორციელების პირობა დადო.

დემოკრატი სენატორების განცხადებით, გამოძიების შეწყვეტა პირდაპირ უკავშირდება აღნიშნულ ინვესტიციას და ადანის კავშირებს პრეზიდენტ ტრამპთან. საქმე ისაა, რომ ინდოელმა მილიარდერმა საკუთარ ადვოკატად რობერტ ჯიუფრა უმცროსი დანიშნა, რომელიც ამავდროულად დონალდ ტრამპის პირადი ადვოკატიც არის. ჯიუფრა უმცროსის განმარტებით, დასახელებული $10 მილიარდის ინვესტიცია ამერიკის ბაზარზე 15 000 ახალ სამუშაო ადგილს შექმნის.

Bloomberg-ის რეიტინგის მიხედვით, $108 მილიარდის ქონებით, გაუტამ ადანი უმდიდრეს ადამიანთა შორის მე-17 ადგილს იკავებს.