რესტორატორთა ასოციაციასა და "ქეა კავკასიას" მთავრობამ EU-ს გრანტის გამოყენების უფლება მისცა

საქართველოს რესტორატორთა ასოციაციასა და „ქეა კავკასიას“ მთავრობამ ევროკავშირისა და ავსტრიის გრანტების გამოყენების უფლება მისცა. საუბარია პროექტზე „მწვანე უნარების ხელშეწყობა მდგრადობისთვის (PROGRESS)“, რომლის განმახორციელებელი ორგანიზაციები არიან Care Caucasus, რესტორატორთა ასოციაცია და Care Austria. პროექტის სრული ბიუჯეტი 863 000 ევროა და განხორციელების ვადები 2024-2026 წლები.

აღნიშნული გრანტის გამოყენების უფლების მინიჭების შესახებ მთავრობის განკარგულება 16 ივლისსაა გამოცემული.

პროექტის ფარგლებში უკვე არაერთი ღონისძიება ჩატარდა, მათ შორის უფასო ონლაინ სატრენინგო კურსი: “კვების სერვისების მწვანე ტრანსფორმაციის უნარების განვითარება”, კვების სერვისებისთვის კონკურსი, ასევე, შედგა ვიზიტი ბარსელონაში, სადაც პროექტის მონაწილეები გაეცნენ მწვანე რესტორნების რეალურ მაგალითებს და შეიტყვეს, თუ როგორ თანამშრომლობს HORECA სექტორი პროფესიული განათლების სისტემასთან.

ცნობისთვის, „გრანტების შესახებ კანონის“ თანახმად, მთავრობის თანხმობის გარეშე უცხოური გრანტის მიღება აკრძალულია. კერძოდ, გრანტის გამცემმა მთავრობისგან უნდა მოიპოვოს თანხმობა, რათა საქართველოში მოქმედმა ორგანიზაციამ, დაწესებულებამ გრანტი გამოიყენოს. წინააღმდეგ შემთხვევაში, გრანტის მიმღები ჯარიმდება გრანტის ორმაგი ოდენობით.