როგორ მოიგებს უკრაინა ომს? – მიხაილო ფედოროვის ხედვა

რუსეთ-უკრაინის ომმა სრულიად შეცვალა თანამედროვე სამხედრო დოქტრინა და აჩვენა, რომ 21-ე საუკუნეში გამარჯვება არა მხოლოდ ცოცხალი ძალისა და არტილერიის რაოდენობაზე, არამედ ინოვაციებსა და ტექნოლოგიურ უპირატესობაზეა დამოკიდებული.

ამ კონტექსტში განსაკუთრებით საინტერესოა უკრაინის ყოფილი ვიცე-პრემიერის, თავდაცვისა და ციფრული ტრანსფორმაციის მინისტრის, მიხაილო ფედოროვის ხედვა, რომელსაც აღმასრულებელი თანამდებობის დატოვება მოუწია, თუმცა დიდი წვლილი მიუძღვის ქვეყნის ტექნოლოგიურ ტრანსფორმაციაში.

მისი მოსაზრებით, უკრაინის გამარჯვების უმთავრესი ფორმულა ასიმეტრიულ ტექნოლოგიურ ომში, სამხედრო ინდუსტრიის მაქსიმალურ გაციფრულებასა და ინოვაციების სწრაფ დანერგვაში მდგომარეობს.

ფედოროვი ხშირად უსვამს ხაზს იმ ფაქტს, რომ უკრაინა რესურსებით ვერასდროს გაუტოლდება რუსეთს ტრადიციულ შეიარაღებაში, ამიტომ ერთადერთი გზა მოწინააღმდეგის დასამარცხებლად არის ტექნოლოგიური უპირატესობის მოპოვება. მისი ფილოსოფიის ქვაკუთხედს დრონების არმია და რობოტიზებული სისტემები წარმოადგენს. მისი აზრით, უკრაინა მაშინ მიაღწევს გარდამტეხ გამარჯვებას, როდესაც ფრონტის ხაზზე ადამიანურ ძალას მაქსიმალურად ჩაანაცვლებს უპილოტო საფრენი, მიწისზედა და საზღვაო აპარატები.

გამარჯვების კიდევ ერთი გადამწყვეტი ფაქტორი, ფედოროვის აზრით, არის ინოვაციების დანერგვის სისწრაფე და ბიუროკრატიის მინიმუმამდე შემცირება, რაც, როგორც ცნობილია, სამთავრობო განხეთქილების ერთ-ერთი მთავარი მიზეზი იყო. მან შექმნა პლატფორმა Brave1, რომელიც აკავშირებს სამხედრო საჭიროებებს, სტარტაპებსა და ინვესტორებს. როდესაც სახელმწიფო და კერძო სექტორი ერთიან ორგანიზმად მუშაობენ, მტრის ნებისმიერ ახალ ტაქტიკაზე პასუხი მყისიერი და ეფექტურია, ამას ისიც ადასტურებს, რომ დღეს უკრაინას მსოფლიოში ყველაზე სწრაფი პირდაპირი შესყიდვების სისტემა აქვს.

გარდა ამისა, ფედოროვი დიდ როლს ანიჭებს მონაცემთა ანალიტიკასა და ხელოვნურ ინტელექტს. სიტუაციური ცნობიერების ციფრული სისტემა, როგორიცაა უკრაინული Delta, საშუალებას იძლევა რეალურ დროში მოხდეს ბრძოლის ველის მონიტორინგი, რაც მეთაურებს სწრაფი და ზუსტი გადაწყვეტილებების მიღებაში ეხმარება. მისი აზრით, ომში იმარჯვებს ის, ვინც უფრო სწრაფად ამუშავებს ინფორმაციას და მართავს საჰაერო თუ ელექტრონული ბრძოლის სისტემებს.

საერთო ჯამში, მიხაილო ფედოროვის აზრით, ნამდვილი გამარჯვება იქნება უკრაინის გარდაქმნა მსოფლიოს წამყვან ტექნოლოგიურ ჰაბად, რომელსაც ნებისმიერ დროს შეეძლება ცვალებად გარემო-პირობებთან ადაპტაცია.

მართალია, ფედოროვმა ორი სამინისტროს ხელმძღვანელობის პერიოდში ნამდვილად შეძლო უკრაინის არმიის ტრანსფორმაცია, თუმცა მისი ხედვის ბოლომდე განხორციელება შეუძლებელი გახდა, რადგან პრეზიდენტმა ვოლოდიმირ ზელენსკიმ 6-თვიანი მუშაობის შემდეგ, 16 ივლისს მიხაილო ფედოროვი თანამდებობიდან გადააყენა.