როგორია უნგრეთის ახალი მთავრობის შემადგენლობა და პროგრამა?
პეტერ მადიარმა უნგრეთის პრემიერ-მინისტრის პოსტი ოფიციალურად დაიკავა. როგორც ირკვევა, მის პარტიას საკანონმდებლო ორგანოში 141 დეპუტატი ეყოლება. მნიშვნელოვანია ითქვას, რომ პარლამენტის წევრთაგან ამ პოზიციაზე აქამდე არცერთს უმუშავია. პარლამენტის თავმჯდომარის პოსტს კი ბიზნესვუმენი აგნეს ფორტშოფერი დაიკავებს. ამასთან, ახალი მთავრობა ქვეყნის პოსტსაბჭოთა ისტორიაში პოლიტიკური ძალების ყველაზე მკვეთრ ცვლას განასახიერებს.
მინისტრთა კაბინეტში სხვადასხვა სექტორის წარმომადგენლები შევიდნენ. საგარეო საქმეთა მინისტრისა და ვიცე-პრემიერის პოსტს Vodafone-ის საზოგადოებასთან ურთიერთობის ყოფილი ხელმძღვანელი ანიტა ორბანი ჩაიბარებს. ეკონომიკისა და ენერგეტიკის სამინისტროს კი Shell-ის ყოფილი ხელმძღვანელი პირი ისტვან კაპიტანი უხელმძღვანელებს. პარალელურად, ჯანდაცვის მინისტრად მანჩესტერსა და ბრისტოლში მომუშავე ექიმი ჟოლტ ჰეგედიუში დაინიშნა. რაც შეეხება გარემოს დაცვის მიმართულებას, მას ზოოპარკის ყოფილი მმართველი ლასლო გაიდოში გაუძღვება.
მთავრობის ახალი პროგრამა კორუფციის აღმოფხვრასა და ოლიგარქიული მმართველობის დასრულებას ისახავს მიზნად. პრემიერ-მინისტრი სასამართლო დამოუკიდებლობის აღდგენასა და მედიაზე პოლიტიკური ზეწოლის დასრულებას გეგმავს. მისი ინიციატივა პრემიერის პოსტზე ყოფნის ვადის ჯამურად 8 წლამდე შეზღუდვასაც ითვალისწინებს. არსებული ინფორმაციით, რეფორმების ნაწილი იქნება იმ ქონების ნაწილის დაბრუნებაც, რომელიც ვიქტორ ორბანთან დაახლოებულმა პირებმა დააგროვეს.
ამასთან, უნგრეთის ახალი ხელისუფლება ევროკავშირთან ურთიერთობების ნორმალიზებასა და გაყინული დაფინანსების დაბრუნებას შეეცდება. პრემიერ-მინისტრი ვარშავაში, ვენასა და ბრიუსელში ვიზიტებს უახლოეს პერიოდში გეგმავს. პეტერ მადიარმა ბუდაპეშტში უკრაინის პრეზიდენტი ვოლოდიმირ ზელენსკიც მიიწვია. მნიშვნელოვანია ითქვას, რომ უნგრეთმა უკრაინისთვის კრიტიკულად მნიშვნელოვანი ნაბიჯი უკვე გადადგა და 90 მილიარდი ევროს ოდენობის სესხის გამოყოფა აღარ დაბლოკა. თუმცა, ცნობილი ხდება ისიც, რომ ქვეყანა მეზობელი სახელმწიფოს პირდაპირი ფინანსური მხარდაჭერისგან თავს შეიკავებს.