რუსეთი სომხეთს გაზის მიწოდებას დროებით შეუჩერებს
რუსეთის ფედერაციის ტერიტორიაზე დაგეგმილი პროფილაქტიკური და სარეაბილიტაციო სამუშაოების გამო, სომხეთში ბუნებრივი გაზის ექსპორტი დროებით შეჩერდება. როგორც ცნობილია, შეზღუდვა ძალაში 15 სექტემბრიდან შევა და 25 სექტემბრამდე გაგრძელდება.
სომხური მხარის განმარტებით, აღნიშნულ პერიოდში ინფრასტრუქტურული სამუშაოები "ჩრდილოეთ კავკასია-ამიერკავკასიის" მაგისტრალურ გაზსადენზე იგეგმება და სომხეთი ამ დროებითი შეფერხებისათვის სრულად არის მზად.
შექმნილი ვითარების მიუხედავად, ადგილობრივი მომხმარებლებისთვის გაზმომარაგება შეუფერხებლად გაგრძელდება. როგორც მთავრობა აცხადებს, ქვეყანა ადგილობრივი მოთხოვნის დაკმაყოფილებას შიდა რეზერვების ამოქმედებითა და ირანიდან ბუნებრივი აირის დამატებითი მოცულობების მიღებით უზრუნველყოფს.
ცნობისთვის, "ჩრდილოეთ კავკასია-ამიერკავკასიის" გაზსადენი სომხეთისთვის რუსული ბუნებრივი აირის მიწოდების ძირითადი მარშრუტია, რომელიც საქართველოს ტერიტორიის გავლით ფუნქციონირებს.
BM.GE
წყარო: bm.ge