რუსეთის ბიუჯეტის 10 თვის დეფიციტმა $63.4 მილიარდს მიაღწია

2026 წლის იანვარ-ოქტომბერში რუსეთის ფედერალური ბიუჯეტის დეფიციტმა $63.4 მილიარდი, ანუ მთლიანი შიდა პროდუქტის 2.3% შეადგინა.

რუსეთის ფინანსთა სამინისტროს წინასწარი მონაცემებით, საანგარიშო პერიოდში ბიუჯეტის შემოსავლები წლიურად 10.8%-ით, $401.9 მილიარდამდე გაიზარდა, ხოლო ხარჯებმა 13.4%-ით მოიმატა და $465.3 მილიარდს მიაღწია.

აღსანიშნავია, რომ გასული წლის ანალოგიურ პერიოდში ბიუჯეტის დეფიციტი ₽3.942 ტრილიონი, ანუ მშპ-ის 1.8% იყო, რაც ნიშნავს, რომ წელს საბიუჯეტო გარღვევა დაახლოებით ერთი მესამედით გაიზარდა.

რაც შეეხება შემოსავლების სტრუქტურას, იანვრიდან დამატებული ღირებულების გადასახადის 22%-მდე ზრდის ფონზე, არასანავთობო და საგაზო შემოსავლები წლიურად 19.1%-ით, $323.9 მილიარდამდე გაიზარდა.

პარალელურად, ნავთობისა და გაზის სექტორიდან მიღებული სახსრები 14.1%-ით, $78 მილიარდამდე შემცირდა და ფედერალური შემოსავლების მეხუთედზე ნაკლები შეადგინა, რასაც სამინისტრო რუბლის გამყარებითა და ნავთობგადასამუშავებელი ქარხნებისთვის გაზრდილი საკომპენსაციო გადასახადებით ხსნის.

ოქტომბერში ნავთობისა და გაზის გადასახადებმა $11.8 მილიარდს მიაღწია, რაც ბოლო წელიწად-ნახევრის მაქსიმუმია და ახლო აღმოსავლეთის კონფლიქტით გამოწვეულ ნავთობის გაძვირებასა და კვარტალური მოგების გადასახადის გადახდას უკავშირდება.

რუსეთის ფინანსთა სამინისტროს პროგნოზით, 2026 წლის ბოლოსთვის ბიუჯეტის დეფიციტი მშპ-ის 3.2%-ს, ანუ $89 მილიარდს მიაღწევს, მაშინ როდესაც ბიუჯეტის კანონით ეს მაჩვენებელი ₽3.786 ტრილიონით იყო განსაზღვრული.

ამ გათვლებით, ნოემბერსა და დეკემბერში, როდესაც სახელმწიფო ხარჯები ტრადიციულად პიკს აღწევს, საბიუჯეტო დანაკლისი დაახლოებით $25.6 მილიარდი იქნება.