"რუსეთის მიერ გაზის გაძვირება ჩვენთვის აპოკალიპტური სცენარი იქნება" - სომხეთის ცენტრალური ბანკი
სომხეთის ცენტრალური ბანკის თავმჯდომარემ მარტინ გალსტიანმა რუსეთის მხრიდან ბუნებრივი აირის შესაძლო გაძვირებაზე ისაუბრა და შესაძლო ფაქტი ქვეყნის ეკონომიკისთვის „აპოკალიპტურ სცენარად“ შეაფასა.
როგორც ის აცხადებს, ენერგორესურსების საფასურის მკვეთრ ზრდას ეროვნულ ეკონომიკაზე „ორმაგი ეფექტი“ ექნება. მთავარი საფრთხე საერთო ინფლაციის მკვეთრ აჩქარებას უკავშირდება და შესაძლოა ეკონომიკური აქტივობის საგრძნობი შემცირება გამოიწვიოს. გალსტიანის განცხადებით, მსგავსი შოკის პირობებში მარეგულირებელი ორგანო მოქმედების სტანდარტულ ჩარჩოს გასცდება და არასტანდარტულ ზომებს მიმართავს.
ქვეყნის პირველი ბანკირი მიიჩნევს, რომ გაზის გაძვირებით გამოწვეული უარყოფითი წნეხი მხოლოდ ენერგეტიკულ სექტორს არ დააზარალებს. გაზრდილი საოპერაციო ხარჯები ადგილობრივ ბიზნესსა და საოჯახო მეურნეობებს მძიმე ფინანსურ ტვირთად დააწვება. ენერგიის გაძვირება წარმოების შემცირებას გამოიწვევს და სამომხმარებლო მოთხოვნას შეასუსტებს.
გალსტიანის თქმით, ეს პროცესი ტრადიციულ ჩარჩოს სცდება და მარეგულირებლისგან „X გეგმის“ ამოქმედებას მოითხოვს. აღსანიშნავია, რომ ხელმძღვანელს დასახელებული გეგმის დეტალები არ დაუკონკრეტებია, თუმცა მან საგანგებო მონეტარული რეაგირების აუცილებლობაზე მიუთითა.
ცნობისთვის, სომხეთი რუსულ ენერგომატარებლებზე კვლავ მაღალ დამოკიდებულებას ინარჩუნებს. პარალელურად, ოფიციალური ერევანი საგარეო ეკონომიკური კავშირებისა და რეგიონული პარტნიორობის დივერსიფიკაციას აქტიურად ცდილობს.
BM.GE
წყარო: bm.ge