რუსეთის ნავთობისა და გაზის შემოსავლები მაისში 32%-ით გაიზარდა

მიმდინარე წლის მაისში რუსეთის ბიუჯეტში ნავთობისა და გაზის გაყიდვიდან მიღებული საგადასახადო შემოსავლები, გასული წლის ანალოგიურ პერიოდთან შედარებით, 32.4%-ით გაიზარდა და $9.3 მილიარდი შეადგინა.

ქვეყნის ფინანსთა სამინისტროს მონაცემები მიუთითებს, რომ საბიუჯეტო შემოსავლების ზრდა ახლო აღმოსავლეთში მიმდინარე ომით გამოწვეულმა ნავთობის გაძვირებამ განაპირობა. აღსანიშნავია, რომ აღნიშნული სექტორი რუსეთის მთლიანი საბიუჯეტო შემოსავლების დაახლოებით მეხუთედს უზრუნველყოფს.

რაც შეეხება წინა თვესთან შედარებას, მაისის მაჩვენებელი აპრილთან შედარებით 20.7%-ით შემცირდა. მიმდინარე კლება უკავშირდება აპრილის თვეში მოგებაზე მიბმულ ციკლურ გადასახადებს, რომელთა ასახვაც მაისში აღარ მომხდარა.

პარალელურად, მიმდინარე წლის პირველ ხუთ თვეში ნავთობისა და გაზის სექტორიდან მიღებულმა მთლიანმა შემოსავალმა თითქმის $41.2 მილიარდი შეადგინა, რაც 2025 წლის ანალოგიურ პერიოდთან შედარებით დაახლოებით 30%-ით ნაკლებია.

მნიშვნელოვანია ითქვას, რომ რუსეთის 2026 წლის ბიუჯეტის პროგნოზით, ნავთობისა და გაზის სექტორიდან წლის განმავლობაში $122.5 მილიარდის მიღებაა დაგეგმილი. მიმდინარე წელს ქვეყნის მთლიანი საბიუჯეტო შემოსავლების $553.4 მილიარდით განსაზღვრა არის პროგნოზირებული.

ცნობისთვის, რუსეთი აშშ-ისა და საუდის არაბეთის შემდეგ ნავთობის მესამე უმსხვილესი მწარმოებელი და ექსპორტიორი ქვეყანაა მსოფლიოში. ენერგორესურსებიდან მიღებული შემოსავალი კრემლის მთავარი ფინანსური წყაროა, რომელსაც მთავრობა უკრაინის წინააღმდეგ მიმდინარე ომის დასაფინანსებლად აქტიურად იყენებს.