რუსეთმა მარცვლეულზე საექსპორტო ბაჟი 2026 წლის ბოლომდე გააუქმა

რუსეთის მთავრობამ მარცვლეულ კულტურებზე საექსპორტო გადასახადი 2026 წლის ბოლომდე სრულად გააუქმა. არსებული ინფორმაციით, ხორბალზე, ქერსა და სიმინდზე მოქმედი ე.წ. მცურავი საექსპორტო ტარიფი 2026 წლის 31 დეკემბრამდე გაუქმდა. ამასთან, მზესუმზირის ზეთზე საექსპორტო ბაჟი ერთ მეტრულ ტონაზე 7,748 რუბლით ($92.13), შროტზე კი 312 რუბლით ($3.71) განისაზღვრა.

რუსეთის აგრარული უწყების განმარტებით, ეს ნაბიჯი მიზნად ექსპორტის ლოგისტიკის რეორგანიზაციის ფონზე მარცვლეულისა და ზეთოვანი კულტურების ადგილობრივი მწარმოებლების მხარდაჭერას ისახავს. უწყების შეფასებით, შემოღებული ზომები ბაზრის მონაწილეებისთვის ხარჯებს შეამცირებს და სარეალიზაციო პირობების პროგნოზირებადობას გაზრდის. სამინისტროში ასევე მიიჩნევენ, რომ ცვლილებები დარგის საექსპორტო პოტენციალს გრძელვადიან პერსპექტივაში მნიშვნელოვნად გააძლიერებს.

ცნობისთვის, რუსეთმა მარცვლეულზე, მზესუმზირის ზეთსა და შროტზე საექსპორტო ბაჟი 2021 წელს შემოიღო. მოქმედი წესის მიხედვით, აქამდე ტარიფის განაკვეთი საბაზისო და საინდიკატორო ფასებს შორის არსებული სხვაობის საფუძველზე იანგარიშებოდა.