რუსეთმა სომხური მინერალური წყლის "ჯერმუკის" იმპორტი და რამდენიმე სახეობის ღვინის და კონიაკის გაყიდვები შეაჩერა

რუსეთმა სომხური მინერალური წყლის "ჯერმუკის" იმპორტი და რამდენიმე სახეობის ღვინის და კონიაკის გაყიდვები შეაჩერა.

კერძოდ, „როსპოტრებნადზორმა“(რუსეთის მომხმარებელთა დაცვისა და ადამიანის კეთილდღეობის ზედამხედველობის ფედერალური სამსახური) სომხეთიდან "ჯერმუკის" წყლის იმპორტის აკრძალვა ეტიკეტზე მითითებულ ინფორმაციასთან პროდუქტის შეუსაბამობით ახსნა. როგორც Forbes.ru წერს, აკრძალვა შეეხო 37 მილიონ ბოთლ წყალს, მათ შორის მინერალურ, ნატურალურ, სამკურნალო და სუფრის სასმელ და გაზიან წყლებს.

"2026 წლის 22 მაისიდან, როსპოტრებნადზორმა დააწესა დროებითი სანიტარული ღონისძიება, რომლითაც შეაჩერა შემდეგი საკვები პროდუქტების იმპორტი და მიმოქცევა რუსეთის ფედერაციაში: „ჯერმუკის ბუნებრივი სამკურნალო სუფრის მინერალური სასმელი გაზიანი წყალი“, წარმოებული სს „ჯერმუკის ჯგუფის“ მიერ.

წყალში აღმოჩნდა ბიკარბონატის იონების, ქლორიდების და სულფატების ჭარბი დონე. პროდუქტის სამკურნალო თვისებების არასწორმა წარმოდგენამ შეიძლება გამოიწვიოს არაეფექტური მკურნალობა და ჯანმრთელობის გაუარესება", - წერია "როსპოტრებნადზორის" განცხადებაში.

გარდა ამისა, უწყებამ ასევე შეაჩერა სომხეთიდან იმპორტირებული რამდენიმე კონიაკისა და ღვინის გაყიდვაც. შეზღუდვები შეეხო „ვედი-ალკოს“, აბოვიანის ბრენდის ქარხნისა და „შაჰნაზარიანის ღვინისა და ბრენდის სახლის“ მიერ წარმოებულ ალკოჰოლურ სასმელებს: „გეტაპ ვერნაშენის“ ნახევრადტკბილი წითელი ღვინო, „ვედი ალკო ხარჯის“ მშრალი თეთრი ღვინო, „T3 ლეგენდები“ „ARNI“, „სომხური კონიაკი 5 ვარსკვლავი“ და შვიდი წლის „შაჰნაზარიანის“ კონიაკი XO. სააგენტომ ამ პროდუქტების მიმოქცევიდან ამოღება ბრძანა.

ცნობისთვის, მანამდე, რამდენიმე დღის წინ, „როსსელხოზნადზორმა“ სომხეთიდან ხილის, ბოსტნეულის და ყვავილების მიწოდებასთან დაკავშირებული პრობლემების შესახებაც განაცხადა. სააგენტოს განმარტებით, 22 მაისიდან რესპუბლიკიდან ყვავილების იმპორტი დროებით შეიზღუდა „რუსეთის ფიტოსანიტარიული უსაფრთხოებისა და ექსპორტის პოტენციალის დასაცავად“.

შეგახსენებთ, 2026 წლის მაისის დასაწყისში, სომხეთ-ევროკავშირის პირველ სამიტზე სომხეთის პრემიერ-მინისტრმა ნიკოლ ფაშინიანმა განაცხადა, რომ ერევანი სიამოვნებით გაწევრიანდება ევროკავშირში. პარალელურად, რუსეთის სახელმწიფო დუმის სპიკერმა ვიაჩესლავ ვოლოდინმა კი თქვა, რომ ფაშინიანი რუსეთის მიმართ „არამეგობრულ პოლიტიკას“ ატარებს. მან ასევე აღნიშნა, რომ უკრაინაც მსგავსად იქცეოდა და „ამისგან კარგი არაფერი გამოვა“.