რუსეთთან დაკავშირებულმა ქსელმა სანქციების გვერდის ავლით $6.9 მილიარდი გადარიცხა

Financial Times-ის მიერ ჩატარებულმა გამოძიებამ გამოავლინა, რომ კრემლთან დაკავშირებულმა საგადახდო ჯგუფმა, A7-მა საერთაშორისო საბანკო სისტემის და სანქციების გვერდის ავლით $6.9 მილიარდზე მეტის მოცულობის კაპიტალი ფიქტიური კომპანიებისა და გაყალბებული დოკუმენტაციის გამოყენებით გაატარა.

ჟურნალისტურმა გამოძიებამ აჩვენა, რომ დასავლური საგადახდო სისტემების ალტერნატივად შექმნილი A7-ის ანგარიშებიდან თანხები მსხვილ გლობალურ ბანკებში ირიცხებოდა. ტრანზაქციების ნაწილი პირდაპირ უკავშირდებოდა რუსეთის უსაფრთხოების სამსახურებისა და სამხედრო სექტორის შესყიდვებს. კერძოდ, ჰონგ-კონგში Standard Chartered-ის ანგარიშებზე A7-თან დაკავშირებული პირებისგან $1.1 მილიარდი ჩაირიცხა, ხოლო First Abu Dhabi Bank-ში გახსნილი ანგარიშებიდან $1.8 მილიარდზე მეტის გადარიცხვა დაფიქსირდა. ფინანსურ ნაკადებს ასევე იღებდნენ DBS-ის, Citigroup-ის, Deutsche Bank-ისა და JPMorgan-ის კლიენტები.

როგორც ირკვევა, სანქციებისა და ფულის გათეთრების საწინააღმდეგო შემოწმებების გვერდის ავლით, ჯგუფი 100-ზე მეტ ფიქტიურ კომპანიას, გაყალბებულ ინვოისებსა და შეცვლილ საბაჟო კოდებს იყენებდა.

First Abu Dhabi Bank-მა განაცხადა, რომ A7-თან დაკავშირებული ყველა გამოვლენილი ანგარიში უკვე დაიხურა, ხოლო Standard Chartered-ში, Citigroup-ში, JPMorgan-სა და Deutsche Bank-ში კი განაცხადეს, რომ AML სტანდარტების დაცვის ერთგულნი რჩებიან, თუმცა დეტალური კომენტარისგან თავი შეიკავეს.