რუსული რუბლი 2022 წლის შემდეგ ყველაზე მკვეთრად გაუფასურდა

რუსეთის სავალუტო ბაზარზე 2026 წლის ივნისი ბოლო ოთხი წლის განმავლობაში ყველაზე მკვეთრი ვარდნით დასრულდა. The Moscow Times-ის ცნობით, ჩინური იუანის კურსი ადგილობრივ ვალუტასთან მიმართებით 10.8%-ით გაიზარდა და 11.62 ₽ შეადგინა, რაც 2022 წლის დეკემბრის შემდეგ ყველაზე მაღალი ყოველთვიური ზრდაა. პარალელურად, შავ ბაზარზე აშშ დოლარის ღირებულება 10.75%-ით გაიზარდა და 78.69 ₽ შეადგინა, ევრო კი 8.3%-ით გაძვირდა, რის შედეგადაც კურსმა 89.8 ₽ მიაღწია.

სავალუტო კრიზისი რუსეთის ენერგეტიკულ სექტორში არსებულ შეფერხებებს ასახავს. უკრაინული დრონების ინტენსიურმა იერიშებმა რუსეთის ტერიტორიის სიღრმეში მდებარე კრიტიკული ინფრასტრუქტურა დააზიანა, რამაც ქვეყნის ჯამური გადასამუშავებელი სიმძლავრეების დაახლოებით 25% მწყობრიდან გამოიყვანა.

რაც შეეხება მოლოდინებს, ექსპერტების შეფასებით, ეროვნულ ვალუტაზე ზეწოლას საგარეო ეკონომიკური ფაქტორებიც გააძლიერებს. აშშ-მა რუსული ნავთობის გაყიდვისთვის განკუთვნილი სპეციალური ლიცენზია აღარ გაახანგრძლივა, რაც Urals-ის მარკის ნავთობზე ფასდაკლებას კიდევ უფრო გაზრდის და საექსპორტო შემოსავლებს შეამცირებს. პროგნოზების თანახმად, მხოლოდ საწვავის გადაუდებელი შესყიდვები დოლარის ღირებულებას დამატებით 1–2 რუბლს შესძენს, წლის ბოლომდე კი კურსმა შესაძლოა 87 ₽-ს მიაღწიოს.

ამას ისიც ემატება, რომ მაისის ბოლოსთვის ქვეყნის ჯამურმა ბიუჯეტის დეფიციტმა 6 ტრილიონ რუბლს, ანუ $76.5 მილიარდს მიაღწია და ამ პრობლემის მოგვარების გზა კრემლში არ ჩანს.