საჰაერო ტვირთბრუნვა დიდწილად, ჩინური სატრანზიტო ნაკადების ხარჯზე იზრდება - SKYLOG-ის მმართველი პარტნიორი

საქართველოს საჰაერო გადაზიდვების ბაზარზე ოფიციალურად დაფიქსირებული 29%-იანი ზრდა, შესაძლოა, იმაზე ნაკლებად აისახებოდეს ადგილობრივ ეკონომიკაზე, ვიდრე ეს ციფრებიდან ჩანს. როგორც BMG-სთან ლოგისტიკური კომპანია SKYLOG-ის მმართველი პარტნიორი გიორგი ზუმბაძე განმარტავს, საჰაერო ტვირთების ზრდის ძირითადი მამოძრავებელი არა ადგილობრივი მოხმარება, არამედ ჩინეთიდან ევროპისკენ მიმავალი ტრანზიტული ნაკადები და „Temu-ს ეფექტია“, რომელსაც ევროკავშირის ახალი რეგულაციების გამო, შესაძლოა, მალე კლება მოჰყვეს.

„ევროპა ელოდება, რომ 30-45%-მდე შემცირდება ეს ტვირთები. დამატებითი გადასახადები არამოგებიანს ხდის Temu-დან შესყიდვებს. ამასთან, ბოლო ერთი თვეა, რაც ნავთობის ფასი ქვემოთ წამოვიდა და მაგალითად, "თურქიშ ეარლაინსმა“ დაიწყო ტარიფების დაწევა - როდესაც ტარიფი საქართველოზე 7 დოლარზე მეტი იყო, უკვე 6 დოლარს ჩამოსცდა. შესაბამისად, საჰაერო ტვირთის დეფიციტია ბოლო სამი კვირის განმავლობაში. ჩემი ვარაუდით, ევროპაში მიღებული რეგულაციები შეამცირებს საჰაერო გადაზიდვების მიმართ მოთხოვნას, იმიტომ რომ ტვირთზე მოთხოვნა შემცირდება“ - ამბობს გიორგი ზუმბაძე BMG-სთან.

მისი განმარტებით, სატვირთო თვითმფრინავების უდიდესი ნაწილი, რომლებიც ჩინეთიდან ევროპაში მიფრინავს, თბილისში მხოლოდ რეისის ნომრის შესაცვლელად ჯდება. ეს აუცილებელია ჩინეთის შიდა რეგულაციების დასაკმაყოფილებლად. შესაბამისად, ამ შემთხვევაში, საქართველო, ამ ჯაჭვში ტექნიკურ როლს ასრულებს.

„როდესაც თვითმფრინავი საქართველოში ჯდება, ეს ტვირთი ავტომატურად ფიქსირდება სტატისტიკაში, მიუხედავად იმისა, რომ მისი დიდი ნაწილი დაუცლელად აგრძელებს გზას ევროპისკენ. ეს არ არის საქართველოს ბაზრის ხარჯზე გაზრდილი მოცულობა, ეს უფრო სატრანზიტო ეფექტია“, - აცხადებს გიორგი ზუმბაძე.

ცნობისთვის, „საქართველოს აეროპორტების გაერთიანების“ ინფორმაციით, პირველ ექვს თვეში, საქართველოს აეროპორტებიდან 21 500 ტონაზე მეტი ტვირთი გადაიზიდა, რაც გასული წლის ანალოგიურ პერიოდთან შედარებით 29%-იან ზრდას წარმოადგენს.