სამშენებლო ზედამხედველობის გაციფრულება წლის ბოლომდე საპილოტე რეჟიმში დაიწყება - მთავრობა

სამშენებლო ზედამხედველობის გაციფრულების საპილოტე ნაწილი წლის ბოლომდე ამოქმედდება. მთავრობის ეფექტიანობის დეპარტამენტის უფროსის, გურამ დუმბაძის განცხადებით, რეფორმის ფარგლებში სამშენებლო სამუშაოების მიმდინარეობის შესახებ ინფორმაცია ციფრულად აღირიცხება და პროცესი საჯარო და ხელმისაწვდომი გახდება.

„ვმუშაობთ ძალიან საინტერესო სიახლეზე, რაც ეხება სამშენებლო ზედამხედველობის გაციფრულებას. გვინდა, რომ წელსვე უკვე საპილოტე ნაწილი ჩავუშვათ და დავიწყოთ ამ რეფორმის ათვისება. ზედამხედველობის პროცესი დღეს ხელით მიმდინარეობს, კომპანიები მუშაობენ ამაზე, თუმცა ზედამხედველობის კომპონენტი მაინც არ არის ისეთი, როგორიც უნდა იყოს“, - განაცხადა დუმბაძემ.

მისი თქმით, სისტემა მოიცავს როგორც საქონლისა და მომსახურების, ისე სამშენებლო სამუშაოების ზედამხედველობას. კერძოდ, ციფრულად შესაძლებელი იქნება სამშენებლო ეტაპების ყოველდღიური მონიტორინგი და იმის აღრიცხვა, თუ რა ეტაპზეა კონკრეტული სამუშაო.

ინფორმაცია საჯარო და ხელმისაწვდომი იქნება, რაც, გურამ დუმბაძის განცხადებით, ხელს შეუწყობს როგორც შემსყიდველი ორგანიზაციების, ისე მშენებლების მიერ სამუშაოების კონტროლსა და ხარისხის მოთხოვნების შესრულებას. მისივე თქმით, პროგრამის შექმნა სახელმწიფოს მიერ დაფინანსდება და ბიზნესისთვის დამატებით ხარჯებს არ გამოიწვევს.

„ეს რაიმე დამატებით დანახარჯებს არ გამოიწვევს ბიზნესისთვის. პროგრამას სრულად ჩვენ ვამზადებთ. ვფიქრობთ, წლის ბოლომდე ჩავუშვათ ეს მნიშვნელოვანი ნაწილი“, - განაცხადა მან.