საქართველო "3+3 ფორმატის" შეხვედრაში მონაწილეობას არ მიიღებს - საგარეო
საქართველო „3+3 ფორმატის“ პირველ საექსპერტო შეხვედრაში, რომელიც 5 ივნისს სანქტ-პეტერბურგში გაიმართება, მონაწილეობას არ მიიღებს.
„საქართველოს პოზიცია ცნობილია, არაერთხელ დაუფიქსირებია ქართულ მხარეს. საქართველოს არასდროს მიუღია მონაწილეობა აღნიშნული ფორმატის შეხვედრებში“, – აცხადებენ საგარეო საქმეთა სამინისტროში.
ოფიციალური წარმომადგენლის, მარია ზახაროვას თქმით, 5 ივნისს სანქტ-პეტერბურგის საერთაშორისო ეკონომიკური ფორუმის ფარგლებში „3+3 რეგიონული თანამშრომლობის პლატფორმის“ პირველი საექსპერტო შეხვედრა გაიმართება.
“5 ივნისს, რუსეთის საგარეო საქმეთა მინისტრის მოადგილე, მიხაილ გალუზინი მონაწილეობას მიიღებს 3+3 რეგიონალური თანამშრომლობის პლატფორმის - აზერბაიჯანი, სომხეთი და საქართველო, პლუს რუსეთი, ირანი და თურქეთი - პირველ საექსპერტო შეხვედრაში სანქტ-პეტერბურგის საერთაშორისო ეკონომიკურ ფორუმზე”, - განაცხადა ზახაროვამ.
„3+3“ ფორმატი აზერბაიჯანისა და თურქეთის ინიციატივით შეიქმნა და სამხრეთ კავკასიის სამი ქვეყნის საქართველოს, სომხეთისა და აზერბაიჯანის, ასევე მათი სამი მეზობლის რუსეთის, თურქეთისა და ირანის თანამშრომლობას ითვალისწინებს. ფორმატის პირველი შეხვედრა 2021 წლის დეკემბერში, მოსკოვში, საგარეო საქმეთა მინისტრების მოადგილეების დონეზე გაიმართა, თუმცა მას საქართველო არ დასწრებია.