საქართველო ჩინური ინვესტიციებისთვის მაქსიმალურად ღიაა - ირაკლი კობახიძე

პრემიერ-მინისტრი აცხადებს, რომ საქართველო ჩინური ინვესტიციებისთვის მაქსიმალურად ღიაა. ამის შესახებ ირაკლი კობახიძემ მთავრობის ადმინისტრაციაში გამართულ პრესკონფერენციაზე BM.GE-ის კითხვის საპასუხდო

საქმე ის არის, რომ დღეს, გენადი არველაძემ ჩინეთთან თავისუფალი ვაჭრობის შეთანხმებაში ცვლილებების რატიფიცირების დოკუმენტი პარლამენტს წარუდგინა და აღნიშნა, რომ დოკუმენტში „ინვესტიციების თავი ჩნდება“, რაც მიზნად ისახავს პირდაპირი უცხოური ინვესტიციების ხელშეწყობასა და ინვესტორებისთვის უფრო პროგნოზირებადი და გამჭვირვალე გარემოს შექმნას. „ეს მნიშვნელოვანი სიგნალი გახლავთ ჩინელი ინვესტორებისთვის, რომ საქართველო მზად არის კიდევ უფრო გააძლიეროს ეკონომიკური თანამშრომლობა ისეთ სექტორებში, როგორიცაა ტრანსპორტი, ლოგისტიკა, ინფრასტრუქტურა, ენერგეტიკა და სხვა სტრატეგიული მიმართულებები, რომელიც ორ ქვეყანას შორის არსებობს“, - განაცხადა ეკონომიკის მინისტრის მოადგილემ.

აქედან გამომდინარე BM.GE-მ კობახიძეს ჰკითხა კონკრეტულად რა მიმართულებით გაამარტივებს ინვესტორების მოზიდვას ეს ცვლილება და ხომ არ იყო ჩინეთთან კომუნიკაციის დროს დასახელებული რაიმე სახის ბარიერები, რაც გამარტივებას საჭიროებდა, რაზედაც პრემიერ-მინისტრმა უპასუხა:

„არავითარი ბარიერები არ არის. მაქსიმალურად ღია ვართ ჩინური ინვესტიციებისთვის.

როგორც გაღრმავდა ჩინეთთან სტრატეგიული პარტნიორობა, ხელი მოეწერა თავისუფალი ვაჭრობის შეთანხმების გაღრმავებას და ამან მოიცვა ინვესტიციების მიმართულებაც. ეს იყო მთავარი საფუძველი, რის გამოც შევიდა ასეთი ცვლილებები შეთანხმებაში. მიზანი თავისუფალი ვაჭრობის შინაარსობრივი გაღრმავება იყო“.