საქართველო წყალქვეშა კაბელის პარალელურად „მწვანე წყალბადის“ მილსადენის მშენებლობას განიხილავს - მინისტრის მოადგილე

საქართველო „მწვანე ენერგეტიკული დერეფნის“ პროექტის ფარგლებში, შავი ზღვის წყალქვეშა ელექტროკაბელის პარალელურად, „მწვანე წყალბადის“ მილსადენის მშენებლობის შესაძლებლობას განიხილავს.

ამის შესახებ სააგენტო Trend-ს ეკონომიკისა და მდგრადი განვითარების მინისტრის მოადგილემ, ინგა ფხალაძემ ბაქოს ენერგეტიკული კვირეულის ფარგლებში განუცხადა.

მისი თქმით, მიმდინარე შეხვედრების მთავარი მნიშვნელობა ქვეყნებს შორის ურთიერთკავშირების გაძლიერებაა, რაც გარე შოკების დაძლევის, ენერგეტიკულ სექტორში არსებული პრობლემების მოგვარებისა და სახელმწიფოების სტაბილურობის განმტკიცების ინსტრუმენტს იძლევა. მინისტრის მოადგილემ ხაზგასმით აღნიშნა, რომ საქართველოსთვის საკვანძო საკითხს ენერგეტიკული უსაფრთხოების გაძლიერება წარმოადგენს, რომლის მიღწევაც მარტო შეუძლებელია და მხოლოდ მეზობელ ქვეყნებთან თანამშრომლობით არის შესაძლებელი.

ამ კონტექსტში ინგა ფხალაძემ ყურადღება გაამახვილა აზერბაიჯანთან, რუმინეთთან და ევროპის სხვა ქვეყნებთან ერთობლივ მუშაობაზე. მან ასევე აღნიშნა, რომ საქართველო და აზერბაიჯანი მრავალწლიანი პარტნიორები არიან, მათ შორის ზამთრის პერიოდში გაზისა და ელექტროენერგიის მიწოდების სფეროში.

„მწვანე ენერგეტიკული დერეფნის“ ფარგლებში ორი მიმართულება რეალიზდება: სახმელეთო მარშრუტი აზერბაიჯანიდან საქართველოს გავლით თურქეთსა და ბულგარეთში, ასევე წყალქვეშა კაბელის პროექტი, რომელიც აკავშირებს აზერბაიჯანს, საქართველოს, რუმინეთსა და უნგრეთს. ეს უკანასკნელი 4 000 მეგავატი სიმძლავრისაა, განკუთვნილია ელექტროენერგიის ექსპორტისთვის და სამხრეთ კავკასიას ევროპასთან აკავშირებს“, - განაცხადა ინგა ფხალაძემ.